Төрөөбүт тылы өрө тутар, дьиҥ сахалыы тыыннаах кыһаҕа Егор Афанасьевиһы талба таҥастаах, сиэдэрэй симэхтээх кыргыттар сайыҥҥы куйааска сөрүүн кымыһынан айах тутан көрүстүлэр. Үлэһиттэр бары салама тутан, уруй-айхал тылларын этэн, нөрүөн нөргүйдүлэр.
Кыһа дириэктэрэ Август Егоров республика кинигэ таһаарар эйгэтигэр сонун сүүрээннэри билиһиннэрдэ уонна Егор Борисовка бу саҥа соторутааҕыта тахсыбыт кинигэлэри көрдөрдө.
Өскөтүн урут кинигэни биһиги көннөрү ааҕар эрэ эбит буоллахпытына, билигин кырачааннарга «саҥарар», аралдьытар, оонньотор, үөрэтэр кинигэ арааһа тахсар. Саҥа бырайыак быһыытынан «Ийэ уонна Алаа Моҕус», «Куоска уонна кутуйах» хомулук остуоруйа кинигэлэрэ күн сирин көрдүлэр. Кинигэ халыҥ оҥоһуулаах, пазл лоскуйдара оҕо толкуйдуур, таҥар, айар-тутар дьоҕурун сайыннарыахтара.
Үрүҥ Тунах ыһыахтары көрсө тахсыбыт Светлана Чоросова «Өбүгэ кэрэтин утумнаан» диэн дьиэ кэргэнинэн сахалыы таҥнарга сүбэ кинигэтэ үгүс дьоҥҥо туһалаах буолуо.
Саха сирин бэчээтин историятыгар аан бастаан «Көрдөөх зоопарк» диэн кыра планшет компьютердаах кинигэ таҕыста. Планшеты баттаан, оҕо ырыа истэр, оонньуур, билиини тургутар ыйытыктарга хоруйдуур. 3D чаҕылхай ойуулаах “Көтөр-сүүрэр саҥата» кинигэни тутан олорон, ойуур саҕатыгар чыычаах ырыатын, кэҕэ этэрин, күөлгэ кус-хаас саҥатын истиэххит, ойуур кыылларын илэ көрбүт кэриэтэ сананыаххыт.
Август Васильевич билигин аан дойду үрдүнэн кинигэ ахсаана аҕыйыы турар кэмигэр, Сахабыт сиригэр кинигэ таһаарыыта элбээтэ, былырыын 1 мөлүйүөнтэн тахса тиражтаах 486 кинигэни таһаардыбыт диэн кэпсээтэ. Кинигэни таптыыр уонна ааҕар дьон баар буоланнар, биһиги иннибит диэки хардыылыыбыт, саҥаттан саҥаны таһаарабыт диэтэ.
Егор Борисов тэрилтэ ситиһиитэ, таһаарыылаах үлэтэ салайааччыттан, айар бөлөхтөн, хас биирдии үлэһит сыралаах үлэтиттэн, идэтин таһымыттан улахан тутулуктаах диэн бэлиэтээтэ. Итини барытын түмэ тартахха эрэ биирдэ үлэ ситиһиилэнэрин эттэ.
Быыстапкаҕа турар кинигэлэртэн кини талан ылан, учууталын, Саха сирин норуодунай суруйааччыта В.С. Яковлев - Далан туһунан сылаастык, истиҥник-иһирэхтик аҕынна. Биһиги бары Далан саха норуотун историятын сырдаппыт «Бүтэй Бүлүү», «Тыгын Дархан» айымньыларын аахпыт буолуохтаахпыт. Ону таһынан, «Саха Маресьевын» С. Макаров туһунан кинигэни чорботто.
Кинигэни таһаарыыга өйөбүлүн иһин махтанан, сүгүрүйэн Егор Борисовка «Бичик» кыһа төрүттээбит саамай үрдүкү наҕаараадатын «Национальнай кинигэни таһаарыыга дьоһун кылаат» диэн бэлиэни дириэктэр Август Егоров туттарда.
Егор Борисов кинигэ таһаарааччылар туох-ханнык кыһалҕалаахтарын туоһуласта, онуоха кыһа үлэһиттэрэ үлэлиир сирдэрэ кыараҕаһын, кыратын эппиттэригэр, итиниэхэ тустаах болҕомто ууруллуох буолла.
Республика общественнай-политическай олоҕор сыһыаннаах кэпсэтии кэнниттэн кыһа үлэһиттэрэ республиканскай былаас ыытар үлэтин биһирииллэрин биллэрдилэр уонна буолаары турар быыбарга Сахабыт сирин олохтоохторо бас-көс киһибитин өйүөхпүт диэн эрэнэллэрин эттилэр.
Комментарии
Авторизация на сайте через социальные сети