Биһиги өрөспүүбүлүкэбитигэр маннык хабааннаах тэрээһин, номнуо иккис сылын ыытыллара, мээнэҕэ буолбатаҕын энергетиктар этэллэр. Ол курдук, биһиги тыйыс тымныы дойдубутугар күммүт уһуна, итиитэ быдан күүстээх буолан, өссө үс сыллааҕыта Кэбээйи Батамайыгар күн сардаҥатыттан үлэлиир бастакы станцияны таҥан үлэҕэ киллэрбиттэрэ. Бу туһунан Ил Дархан эбээһинэһин толорооччу Егор Борисов бэйэтин киирии тылыгар эмиэ санаан ааста.
“Билигин Кэбээйигэ, Өймөкөөҥҥө, Үөһээ Дьааҥыга күн сардаҥытыттан үлэлии турар электростанциялар көдьүүстээхтэрэ уонна табыгастаахтара экономическай уонна техническэй өттүнэн быһаарыллан турар. Биһиги өрөспүүбүлүкэбит сирин-уотун 64 % дьоҕус энергетика зоната ылар. Бу улуустарга нэһилиэнньэ 15 % олорор. Күн бүгүн өрөспүүбүлүкэҕэ 125 дизельнэй электростанция үлэлиир. Бу станцияларга сыллата 80 тыһ. т сыаналаах дизельнэй уматык таһыллар. Онон, биһиги уоту солбуйар ньымалары сайыннарыыны өйүүбүт. СӨ правительствота Тикси оройуонугар тыалынан үлэлиир станция пааркатын оҥоруу бырайыагын, сметатын үөрэтэ сылдьабыт”, -- диэн эбэн эттэ.
Дизельнэй уматык сыаната кэлиҥҥи сылларга олус үрдээтэ. Аны хоту уонна сылдьарга эрэйдээх, кытыы сытар нэһилиэнньэлээх пууннарга дизельнэй электростанциялар үлэлии тураллар. Онон бу станциялары үлэлэтии ороскуота элбэҕиттэн, электроэнергия бэйэҕэ турар сыаната үрдүк. Холобур, Өймөкөөн Үчүгэйигэр биир киловатт чаас электроэнергия 33 солк. 77 харчы, Депутатскайга 27 солк. 25 харчы, Үөһээ Дьааҥы Үҥкүүрүгэр 54 солк. тэҥнэһэр. Бу нэһилиэктэргэ дьоҕус СЭС-ри туруордахха, сыана быдан чэпчиэ этэ.
Маны таһынан Саха сиригэр аан бастакы уонна соҕотох тыалынан үлэлиир 250 кВт кыамталаах сэдэх установка 2007 сыллаахха тутуллан, маны инникитин сайыннарыы былаана баар. Камчаткаҕа маныаха маарынныыр тыал эргитэр станциялара Уус-Камчатскай уонна Никольскай бөһүөлэктэригэр үлэлээн, аҕыйаҕа суох уматык кэмчилэммитин туһунан “Восток энергетическэ” ситимнэрэ” холдинг бэрэстэбиитэлэ Алексей Каплун иһитиннэрдэ.
Оттон иллэрээ күн, Хаҥалас улууһун Тойон-Арыы сэлиэнньэтигэр күн сардаҥатынан үлэлиир холбоһуктаах электрическэй станция үлэҕэ киллэриллибитэ. Германия уонна Италия дойдулара кыттыһан оҥорбут MPS PP Hybrid СЭС-рэ 20 кВт кыамталаах. Панеллар күн тыгар кэмигэр үлэлээн баран, түүҥҥү өттүгэр аккумуляторнай батарыайалара холбоноллор. Онон, уоту солбуйар энергетика сайдыытыгар биһиги өрөспүүбүлүкэбитигэр дьоһун хардыылар оҥоһуллан эрэллэр.
Былырыыҥҥы конференцияны Россия, аан дойду энергетическэй хампаанньалара улаханнык сэргээн, быйыл Кытайтан, Японияттан, Кореяттан, Америкаттан тиийэ кэлэннэр икки күн устата санаа атастаһыахтара, саҥа бырайыактары үөрэтиэхтэрэ.
Комментарии
Авторизация на сайте через социальные сети