«Бу элбэх киһи олоҕун толук ылбыт улуу уонна ынырык сэрии. Билигин ол кэмнэри эргитэ санаан, сэрии кыттыылаахтарын хорсун-хоодуот быһыыларын суолтата сүҥкэнин, улаханын өйдүүбүт. Эһиги баар буолаҥҥыт, билиҥҥи көлүөнэ оччолорго буолбут иэдээн, улуу кыайыы туһунан билэр кыахтаах. Дойдуга бэриниилээх буолууга иитиигэ эһиги хорсун быһыыгыт ылар оруола олус улахан. Иитиллибит Ийэ сири, төрөөбүт төрүт дойдуну булгуччу көмүскүөхтээхпит диэн санаа хас биирдии киһи сүрэҕэр-дууһатыгар, өйүгэр-санаатыгар иитиллиэхтээх уонна иҥиэхтээх», - диэтэ Егор Борисов. Сэрии уонна тыыл бэтэрээннэрин өйүүргэ, кинилэр олохторун таһымын үрдэтэргэ туһуламмыт быһаарыылар инникитин да ылыллыахтарын кини эрэннэрдэ.
«Оччолорго фашизм аан дойдуну бүтүннүүтүн саба баттыыр баламат соругу ылыммыта. Бүгүн сорох дойдуларга ити хатыланарын көрө, истэ, билэ сылдьабыт. Бардам, ньүдьү-балай дьон бэйэлэрин бэрээдэктэрин соҥнуу, олохтуу сатаан, аан дойдуга бүтүннүүтүгэр улахан кыһалҕаны үөскэттилэр, айдааны-араллааны тартылар», - диэтэ Е. Борисов.
Саха сирин буойуннара Аҕа дойдуну көмүскүүр Улуу сэриигэ войскалар бары көрүҥэр сэриилэспиттэрэ. Кинилэр куруук бэргэн ытааччы, сатабыллаах разведчик, бастыҥ буойун быһыытынан сыаналаммыттара. 24 киһи Сэбиэскэй сойуус Дьоруойун үрдүк аатын ылбыта, биэс киһи Албан аат уордьанын толору кавалердарынан буолбуттара, алта киһи Богдан Хмельницкай, Александр Невскэй уонна Нахимов уордьаннарын ылары ситиспиттэрэ. 10 тыһ. тахса киһи бойобуой уордьаннарынан уонна мэтээллэринэн наҕараадаламмыттара.
Комментарии
Авторизация на сайте через социальные сети