Украина илин өттүгэр барар референдум — бигэ турукка суолу солуур
Россия олохтоохторун барыларын Украинаҕа буола турар быһыы-майгы улаханнык долгутарын уратытык биллим. Ити бигэ туругу өйөөһүнү кытта ыкса ситимнээх. Бары Украина бөҕөргүөн, бигэтийиэн баҕараллара чуолкай. Дьон, регион, уопсай үгэс икки ардыларыгар ситим баара өйдөнөр. Онон, Украина илиҥҥи өттүгэр буолар референдум бигэ туругу олохтуурга олугу ууруоҕа.
РФ састаабыгар киирбит Севастополь куораты, Крымы биһиги, сахалара өйүүр туһунан быһаарыыны ылбыппыт, кинилэргэ гуманитарнай көмөнү оҥордубут. Бу үлэни правительство председателин солбуйааччы Александр Власов быһаччы сүрүннүүр.
Бэтэрээннэргэ - кыһамньыны
Аҕа дойду Улуу сэриитигэр Кыайыы 69 сылын бэлиэтээтибит. Республикаҕа сэрии кыттыылаахтара, бэтэрээннэрэ букатын аҕыйах хааллылар — уопсайа 310 киһи. Кинилэр үгүстэрин кытта мин көрсөн кэпсэппитим. Бүгүн кинилэргэ государство ураты улахан болҕомтотун уурар.
Бэтэрээннэри кытта эһиил буолар Кыайыы 70 сылын туһунан өссө кэпсэттибит. Мин республика правительствотыгар ыам ыйын устата Кыайыы 70 сылын тэрийэргэ анаммыт быстах кэмҥэ республика баһылыгын э.т. ыйааҕын барылын бэлэмнииргэ сорудахтаатым. Онно биһиги бэтэрээннэрбит өйдөбүнньүк монуменнары — дьоруойдарга пааматынньык уонна сквер тутуутун туһунан туруорсуулара, этиилэрэ аахсыллыахтара дии саныыбын.
Ыйаахха итини таһынан атын быһаарыылар эмиэ киириэхтэрэ. Ол иһигэр социальнай суолталаах боппуруостар Кыайыы үбүлүөйүгэр олоххо киириэхтэрэ. Сыл ахсын Кыайыыны уһансыбыт, эйэлээх олоҕу эргиппит ытык дьоммут аҕыйаатар аҕыйаан иһэллэр. Кинилэр доруобуйаларын тупсарарга, эргиччи өйүүргэ кыаллары барытын оҥоруохтаахпыт. Икки сылынан бэтэрээннэргэ гериатрическэй киини тутарга республика правительствотыгар сорудахтанна.
Халаан уонна уу хаачыстыбатын тустарынан
Саха сиригэр сайын эргийдэ, сотору кэминэн сайыҥҥэ үлэлэр саҕаланыахтара. Кэлиҥҥи күннэргэ халаан туһунан улаханнык долгуйдубут. Саас быйыл хаһааҥҥытааҕар да эрдэлээтэ. Халаан тула быһыыны-майгыны кыраҕытык хонтуруолуубун. Бүгүҥҥү туругунан Өлүөнэ өрүс мууһа киин улуустарга этэҥҥэ ааста. Муус алын кирбиитэ билигин Сангаар аллараа өттүгэр баар. Ойоҕос өрүстэр Витим, Өлүөхүмэ, Амма кыһалҕаны үөскэппэккэ Алдаҥҥа тиийдилэр. Быйыл барыта итинник эриэ-дэхси буолуо, уустугу үөскэтиэ суоҕа дии саныыбын.
Дьону-сэргэни иһэр уунан хааччыйыыга кэккэ ыарахаттар бааллар. Маны мин хонтуруолуубун. Дьону иһэр уунан босхо хааччыйар туһунан правительствоҕа сорудах бэриллибитэ.
Ууну ыраастыыр тиһик суоҕун кыһалҕата хас эмэ уонан сыллар тухары салҕанан барар. Итини туоратар туһугар киин куоракка аныгы водозабор эбийиэгин тутар быһаарыыны правительство ылынна. Биллэн турар, бу бырайыак ороскуота кырата суох, ол да буоллар, кыһалҕаны туоратыыга күүрүүлээхтик ылсыахпыт. Икки сыллааҕыта Мииринэйгэ уу боппуруоһа эмиэ олус сытыытык турбута. Икки сыл устата итиннэ ууну ыраастыыр эбийиэк тутулунна.
Аһаҕас кэпсэтии буолуоҕа
Үгэс быһыытынан мин арҕаа, киин, хоту улуустарынан сааскы айаным саҕаланыа. Ити былаһын тухары кыһалҕаны көдьүүстээхтик быһаарыахпыт.
Навигация, кыстыкка бэлэмнэнии үлэлэрэ — иннибитигэр турар. Маны барытын болҕомтобут үөһүгэр тутуохпут. Миэстэтигэр тиийэн былаас уорганын, хаһаайынныыр субъектар салайааччыларынаан буолбакка, туох-ханнык иннинэ нэһилиэнньэни кытта көрсөн кэпсэтиэм-испэтиэм. Онон дьон-сэргэ аһаҕас кэпсэтиигэ бэлэмнэннин.
Комментарии
Авторизация на сайте через социальные сети