«Биир ньыгыл Россия» партияттан республика баһылыгын дуоһунаһыгар кандидаты талар тэрээһин — праймериз саҕаланна. Партия устаабын кытаанахтык тутуһар уонна праймеризка кыттар туһунан санааны ылынным.
Бүтүн норуот итэҕэлин ылар туһугар миигин партиятааҕы коллегаларым төһө өйүүллэрин билиэх тустаахпын.
Партияттан турар кандидаттар ортолоруттан сөптөөх кандидаты быһаарарга праймериз саамай дьиҥнээх уонна дьэҥкэ сыһыан дии саныыбын. Манна үспүкүлээннээһин, киксии эҥин суох. Онон ким баҕалаах бу тэрээһиҥҥэ кыттар толору кыахтаах. Демократическай принципкэ олоҕуран бүтэһиктээх быһаарыы ылыллар.
Хомойуох иһин, сорох «политиктар» уларыйыы, кризис кэмигэр дьиҥнээх уонна чопчу дьыаланан буолбакка, кыһыл тылларынан кынаттанан дьон итэҕэлин ыларга үөрэнэ быһыытыйдылар. Быыбар кампаниятын кэмигэр сымыйаны эрэннэрэр, кураанаҕы куустарар түгэннэрэ элбэх.
Кинилэр кэмиттэн кэмигэр норуот депутатын мандаатын эбэтэр ханнык эмэ сир салайааччытын дуоһунаһын ылаллар. Ол эрээри наадалаах, сыаналаах каадырынан буолбаттар. Кинилэргэ үгүстэригэр араас кэмҥэ үрдүк дуоһунас, боломуочуйа, улахан итэҕэл абаанса быһыытынан бэриллибитэ. Дуоһунастаах кэмнэрин тухары бэйэлэрин толору көрдөрөргө кыахтара тутах буолар. Тоҕо оннугуй? Тоҕо диэтэххэ, кинилэр тус интэриэстэрин туохтааҕар да үрдүктүк туталлар, баайга-дуолга аһара дураһыйаллар. Сымыйа сураҕынан, кириитикэлээһининэн, эппиэтинэһи атын санныга сүктэриинэн эрэ муҥурданарга тиийэллэр.
Суобастаах, сэмэй, дьон-сэргэ, норуот, республика туһугар ханнык да төлөбүрэ, манньата суох үлэлиир политиктар, үөрүөх иһин, суох буолбатахтар, бааллар. Кинилэр бэйэлэрин тустарынан санаабакка олох, үлэ эргийэр киинигэр, үөһүгэр сылдьаллар. Уопсастыба олоҕун тупсарыыга, үөскээбит уонна баар кыһалҕаны туоратыыга күннэтэ сыралаһаллар. Маннык дьоҥҥо итэҕэйиэххэ, эрэниэххэ наада.
Мин биир партиялаахтарбын ытыктыыбын уонна кинилэр үгүстэрэ республика баһылыгын дуоһунаһыгар кандидатынан турар кыахтаахтар диэн сыаналыыбын.
Бэйэм праймеризка чэпчэкитик уонна ыраас суобастаахтык кыттабын. Партия иһинээҕи талар сиидэлээһини ааһаммын, быыбардааччылар иннилэригэр чиэһинэй буолуом. Сүрүн быыбар саҕана ити курдук чиэһинэй буолууну кытаанахтык ирдиэҕим.
Бүгүҥҥүттэн ыла үгэс курдук, улуустарга сааскы айаным саҕаланар. Бу сырыыбар мин куруук буоларын курдук, дьону-сэргэни кытта элбэхтэ көрсүөм, ирэ-хоро кэпсэтиэм-ипсэтиэм. Баар кыһалҕаттан тахсар суолу тобулары бары бииргэ өрө тутуохпут, толкуйдуохпут. Таарыччы праймеризка кыттыам. Дьон-сэргэ олоҕун таһымын биллэрдик үрдэтии — мин тутуһар сүрүн соругум. Быыбар иннинээҕи ыйдар чопчу итиниэхэ туһаайыллыахтара.
Комментарии
Авторизация на сайте через социальные сети