Владимир Путин салайааччылаах Россия делегациятын састаабыгар киирэн Егор Борисов  Кытайга бара сылдьыбыта.

«Шанхайга буолбут көрсүһүүгэ экономикаҕа хардарыта дьайсыыга кэккэ миэрэлэр ылыллыбыттарын таһынан стратегическай суолталаах политическай хардыы оҥоһулунна. Ити Россия тас политиката күүстээҕин, ситиһиилээҕин туоһулуур. Кытайы кытта уопсай тылы буллубут. Европа Россия экономикатыгар санкциялары киллэрэ турар кэмигэр бу суолтата ураты улахан», – диэтэ Егор Борисов.

CNPC компания уонна «Газпром» ААО икки ардыларыгар түһэрсиллибит сөбүлэҥинэн, Чайанда гааһа Кытайга атыыланыаҕа.

«Газ турбатын тутуу 2014 сыл бүтүүтүттэн ыла саҕаланыаҕа, баараҕай бырайыак 5-6 сылынан олоххо киириэҕэ. Саҥа тиһигинэн Кытайга сыл аайы 30 млрд кубометр газ тиэрдиллиэҕэ. Бырайыак кыамталаахтык, тилэри үлэлээн киирэн бардаҕына, нолуоктан үп-харчы киириитэ биллэ улаатыаҕа. Ити республика бюджетын бөҕөргөтөрө чуолкай. Оччотугар тутуу, хамнас, социальнай суолталаах элбэх кыһалҕабыт быһаарыллыаҕа », - диэтэ Е. Борисов.

Өлүөнэ өрүс пароходствота (ЛОРП) Арктика улуустарыгар таһаҕаһы тиэрдиини хааччыйар соҕотох флот. Соторутааҥҥы кэмҥэ диэри пароходство (ЛОРП) акциятын 25,5% республика бас билиитигэр баара. Эмиэ бачча өлүүнү федеральнай киин ылара. Акция онтон атына чааһынайдар илиилэригэр этэ.

"Москва акцияларга бэйэтин ирээтин атыылаары гыммыта. Биллэн турар, чааһынайдар барыһы сомсон ылар эрэ баҕалаахтар. Оттон государство дьон олоҕун сөптөөхтүк хааччыйыыны инники күөҥҥэ тутар. Онон акция хонтуруоллуур пакетын государство бас билиитигэр хааларыгар Саха сирэ улахан интэриэстээх. Үөһэ этиллэр пароходствоны хонтуруоллааһын стратегическай өттүнэн улахан суолталаах түгэн. Егор Борисов уонна республика правительствота үс сылтан ордук кэм устата бу туһунан федеральнай киини кытта кэпсэппитин, ырыппытын  түмүгэр Егор Афанасьевич биһиги дойдубут уратытыгар Москваны итэҕэппитэ. Онон федеральнай киин ЛОРП акцияларын приватизациялыыртан аккаастанна уонна республикаҕа биэрдэ. «Федеральнай киин бэйэтин акцияларын республикаҕа биэрбитин кэнниттэн тэрилтэ акцияларын хонтуруоллуур пакета Саха сиригэр буолла. Сорох чааһынай дьон пароходство баайын-дуолун республика тас өттүгэр таһаарар санаалара тохтуоҕа. Өрүс пароходствотын (ЛОРП) аны республика хонтуруоллуоҕа", - диэтэ Егор Борисов.

«От первого лица» телепередача матырыйаалларынан