Агропромышленнай комплекс уонна айылҕа харыстабылын; уопсастыбаннай уонна социальнай сайдыылар; тутуу комплекса уонна инфраструктураны сайыннарыы; тырааныспар уонна олоҕу хааччыйыы; экономика уонна промышленнай политика Саха сирин баһылыгын уонна барыбыыталыстыбатын дьаһалтатын саҥа структуратын үөскэтэллэр. Департаменнар сыһыаннаах бырабыыталыстыба бэрэссэдээтэллэрин солбуйааччыларын, министиэристибэлэри уонна госкэмитиэттэри кытта ыкса ситимнээхтик үлэлиэхтэрэ.

«Ис политика департаменын үлэтигэр дьон көрдөһүүтүгэр, туруорсуутугар ураты болҕомто ууруллуоҕа. Департамент дьонтон киирбит көрдөһүүлэри, ыйытыктары ырытыаҕа уонна хас биирдии ыйытыкка, көрдөһүүгэ толору хоруйу биэриэҕэ. Департамент быһыыны-майгыны кэтиир киини кытта биир ситиминэн үлэлиэҕэ.

 Егор Борисов  дьон ыйытыгын, көрдөһүүтүн кытта үлэ тосту уларыйыаҕын туһунан эрдэ этэн турардаах. «Былаас уорганыгар дьон көрдөһүүтүн сорох биэдэмистибэлэр үксүгэр суругунан көлбөрүтүнэн кэбиһэллэрэ баар чахчы. Онон, мин бу систиэмэни төрдүттэн уларытар туһунан быһаарыыны ылынным. Бырабыыталыстыба уонна баһылык дьаһалтатыгар дьон көрдөһүүлэринэн тус сыаллаахтык дьарыктанар отдел баара. Билигин дьон ыйытыгын, көрдөһүүтүн тилэри ырытар структура үөскүөҕэ. Ити тэрилтэ хас биирдии ыйытыкка толору уонна ситэри хоруйу биэриэҕэ», - диэбитэ кини.

Министиэристибэлэр уонна государственнай кэмитиэттэр бу үлэҕэ эппиэттээх дьону аныылларыгар Егор Борисов сорудахтаата.