Кинилэр өрөспүүбүлүкэ социальнай-экономическай туруга бөҕөргүүрүгэр ылыллар миэрэлэри дьүүллэстилэр. Үлэ ырыынагар баар тыҥааһыны аччатыы, үлэтэ суох сылдьар дьон ахсаана эбиллибэтин, РФ президенин ыам ыйынааҕы ыйаахтарын олоххо киллэрии кэпсэтиһии киинигэр турдулар.

Ольги Голодец, өрөспүүбүлүкэҕэ демография туруга куһаҕана суоҕун, регион экономическай көрдөрүүтэ дьаарханыыны үөскэппэтин, о.д.а. туһунан эттэ уонна сорох кыһалҕалар федеральнай таһымҥа быһаарыллыахтарын бэлиэтээтэ.

Оҕо саадыгар миэстэ суоҕа өрөспүүбүлүкэҕэ сытыытык турар кыһалҕа. 2010 сыллаахха СӨ бырабыыталыстыбата, РФ Үөрэххэ, наукаҕа министиэристибэтэ Саха сиригэр оскуола иннинээҕи саастаах үөрэхтээһини сайыннарыыга анаммыт инновационнай бырайыагы бэлэмнээбиттэрэ. Бырайыакка этиллибитинэн, аан дойдутааҕы баантан үбү-харчыны иэс ылан 8820 миэстэни хааччыйар оҕо саадтара тутуллуохтаахтара. Кэлин быһыы-майгы уларыйан ити болдьоҕо уһатыллынна.  

Уустук кыһалҕаны быһаарарга Егор Борисов эппитинэн, өрөспүүбүлүкэ араас барыйааны, ол иһигэр государственнайа суох секторы кыттыннарары толкуйдуур. Оҕо саадтарын туппатахха, кыһалҕа өтөрүнэн быһаарыллыа суоҕун кини эттэ. Онно олоҕуран Егор Борисов  Ольга Голодецтан федеральнай бюджеттан эбии көмөнү туруоруста. РФ бырабыыталыстабытын вице-премьера Үөрэх уонна Үп министиэристибэлэригэр туһаайан Саха сиригэр оҕо саадтарыгар уочараты суох оҥорууга көмөлөһөргө сорудахтаата. Кэлиҥҥи икки сылга региоҥҥа оскуола иннинээҕи үөрэхтээһини модернизациялааһыҥҥа 2 млрд солк. федеральнай субсидия быһыытынан бэриллибитин бэлиэтээн этиэххэ сөп.

Егор Афанасьевич итини таһынан булгуччулаах медицинскэй страхование федеральнай фондатыттан бэриллэр субвенция бэрээдэгэр уларытыылары киллэрэри туруоруста. Кини билигин үлэлиир бэрээдэк түмүгэр Саха сирэ 4,3 млрд тахса солк. сүтэрэрин ыйда. Онтон ити ыраах сытар, мөлтөх суоллаах-иистээх нэһилиэктэри босхо медицинскэй көмөнөн хааччыйарга харгыһы үөскэтэр. Онуоха Ольга Голодец бу боппуруоһу сирийэн үөрэтиэх буолан эрэннэрдэ.

Егор Борисов Арктикатааҕы государственнай институт үөрэнэр куорпуһун иккис уочаратын уонна уопсай дьиэтин тутууну үбүлээһини 2016-2020 сылларга үөрэҕи сайыннарыы федеральнай тус сыаллаах бырагыраамаҕа киллэрэри туруоруста.

Ону таһынан Дьокуускайга оҕо доруобуйатын чөлүгэр түһэрэр өрөспүүбүлүкэтээҕи киини тутууну 2016-2014 сс. федеральнай аадырыстаммыт инвестиционнай бырагыраамаҕа киллэрэргэ эттэ.

Абалаах базатыгар  регионнар икки ардыларынааҕы санаторнай-курортнай киини тутарга Егор Борисов этиитин Ольга Голодец өйөөтө.

Мунньахха РФ үпкэ миниистирин солбуйааччы Айрат Фаррахов, РФ үөрэххэ, наукаҕа миниистирин солбуйааччы Александр Климов, Москваҕа Саха сирин бастайааннай бэрэстэбиитэлэ Алексей Стручков, РФ бырабыыталыстыбатын вице-премьерин аппараатын үлэһиттэрэ кыттыыны ыллылар.