Ону тэҥэ Егор Борисов Арҕааҥы дойдулар санкцияларыгар кыттыһартан аккаастаммыт Корея Республикатын былаастарын позицията Российскай Федерацияҕа улахан суолталааҕын бэлиэтээтэ. Маннык быһаарыныы ырааҕы өтө көрүү буоларын, Россия уонна Корея Республикатын икки ардыларыгар инникитин хардарыта барыстаахтык үлэлээһиҥҥэ олук буолуоҕун эттэ.

Губернатор Чой Мун Сун Саха сирэ уһун сыллар усталарыгар эрэллээх партнер буоларын эттэ. 2007 сыллаахха түһэрсиллибит дуогабарга олоҕуран доҕордуу регионнар инновационнай политикаҕа, медицинаҕа, спорка, туризмҥа, о.д.а. эйгэҕэ уопут үллэстэллэр. Аҕыйах хонуктааҕыта Кангвон провинция бэрэстэбиитэллэрэ Дьокуускайга «Арктика: туруктаах сайдыы кэскиллэрэ» норуоттар икки ардыларынааҕы научнай-практическай конференция үлэтигэр кыттыыны ылбыттара.

Чой Мун Сун Кангвон делегацията эһиил Дьокуускайга ыытыллар Хотугу Форум генеральнай ассамблеятын мунньаҕар хайаан да кыттыа диэтэ, уонна Саха Республикатыгар баар доҕотторун ыалдьыттатарга бэлэмин эттэ. Манна даҕатан эттэххэ, Кангвон провинцияҕа баар Пионгчанг куоракка 2018 сылга Кыһыҥҥы Олимпийскай оонньуулар ыытыллыахтара.

Көрсүһүү кэмигэр өрүттэр бииргэ үлэлээһин араас хайысхаларын дьүүллэстилэр. Онно биир сүрүнүнэн транспорт салаата буолар чинчилээх. Анарааҥылар Янг-Янг аэропортан Дьокуускайга уонна Улан-Удэҕа рейстэри олохтуурга интэриэстээхтэр. Оттон Саха сирэ Уһук Илиҥҥи регионтан Соҕуруу Кореяҕа салгынынан сылдьыһыыга үлэлэһэр баҕалаах.