Кэлиҥҥи икки нэдиэлэҕэ ойуур баһаардарыттан өрөспүүбүлүкэҕэ уустук балаһыанньа үөскээтэ. Өртөөһүн бобуллубутун түмүгэр от ыйын 10 күнүнээҕи туругунан баһаар ахсаана биллэ аччаабыта. Ол курдук, өрөспүүбүлүкэҕэ 30 тыһ. га сири хаппыт ойуур 142 баһаара буолбута. Бу иннинээҕи сыллары кытта тэҥнээтэххэ, ити хас эмэ бүк аҕыйах.

Ол эрээри, от ыйын 10-тан 23-гэр диэри 500 тыһыынча гектар сиргэ тарҕаммыт ойуур 72 баһаара буолбута.

Дьон олоҕор куттал үөскээбитинэн от ыйын 15 күнүгэр Егор Борисов өрөспүүбүлүкэ ойуурдарыгар ыксалаах быһыы-майгы режимин биллэрбитэ. Уоту умуруорууга эбии күүс, үп-харчы түмэ тардыллыбыта.

Кэбээйи Чагдатын таһынааҕы ойуурга улахан баһаар турбута. Манна кэлиҥҥи икки ыйга биирдэ да ардах түспэтэҕэ быһыыны-майгыны уустугурдубута. Чагда таһынааҕы баһаары умуруорууга 177 киһи, онтон 56 олохтоох дьон үлэлииллэр.

Бе-200 амфибия-самолет уонна ууну сүөкүүрдээх вертолет, оттон сиргэ өрөспүүбүлүкэ сулууспаларын кытта Амуртан, Хабаровскайтан кэлбит баһаары умуруорааччылар үлэлииллэр. Владивостоктан 25 десантник кэлиэхтээх.

От ыйын 24 күнүгэр Россия ЫБММ вертолета көмөҕө кэлбитэ. Чагдаҕа хойуу буруоттан оҕолору, оҕолоноору сылдьар дьахталлары, кырдьаҕастары көһөрбүттэрэ.

Олохтоохтор уоту умуруорууга көхтөөхтүк уонна көдьүүстээхтик үлэлииллэр. Сокуоннай саастарын ситэ илик оҕолор ыарахан үлэттэн туора турбаттар.

Егор Борисовы кытта көрсүһүүгэ дьон биллибитинэн, сокуоннай саастарын ситэ илик оҕолор үлэлэрэ төлөммөт. Сокуон быһыытынан оҕолору үлэлэппит улахан дьон сэмэлэнэллэр.

Биллэн турар, оҕолорго махтаныахтара. Ити туһунан Егор Борисов эрэннэрдэ.

Оттуур ходуһа баһаартан эмсэҕэлээбитинэн Саха сиринээҕи тыа хаһаайыстыбатын министиэристибэтэ өйүөҕэ. Уокка былдьаммыт икки муоста суһаллык чөлүгэр түһэриллиэхтээх.

Дьон Егор Борисовка интернет суоҕун, суотабай сибээс хаачыстыбата быстар мөлөтөҕүн эттилэр. Сири мелиорациялааһыҥҥа, эдэр ыалга олорор дьиэни тутууга, оскуола эргэрбитин тула баар кыһалҕаларын үллэһиннилэр. Сэлиэнньэҕэ 7-гэр диэри саастаах 80-тан тахса оҕо баарын, кинилэри үөрэнэллэригэр, сайдалларыгар усулуобуйа тэриллиэхтээҕин ыйдылар.

Дьон туруорсуутун, туруулаһыытын түмүгүнэн Егор Афанасьевич быһаарыылары тута ылынна. Сорох сайабылыанньаларга бырабыыталыстыба таһымыгар быһаарыылар ылыллыахтара. Егор Боисовы кытта Кэбээйиигэ вице-премьер Анатолий Скрыбыкин  уонна ойуур сыһыаннаһыыларын департаменын салайааччыта  Вячеслав Попов сырыттылар.