Пресс-конференция саҕаланыыта  Егор Борисов Турция дьыалабыай эргимтэтин кытта субу соторутааҥҥыта буолбут кэпсэтиһиилэр тустарынан суруналыыстарга эттэ.

«Туроктар биһиги уруулу омуктарбытын бэлиэтииллэр. Арааһа, манна кэлэллэригэр дьоһуннук бэлэмнэммиттэр. Кинилэр Саха сирин улаханнык интэриэһиргииллэр. Ити интэриэстэрэ биһиги баайдаах сирбитигэр сыһыана суох. Ордук гостиница бизнеһин уонна тутууну өрө туталлар», - диэтэ Егор Афанасьевич.

Пресс-конференция кэмигэр суруналыыстар араас ис хоһоонноох элбэх ыйытыктары биэрдилэр, кэпсэтиини тартылар. Егор Борисов республика олохтоохторун кытта көрсүһүүлэрин түмүгүн, ДьКХ эйгэтигэр туох ситэри быһаарыллыахтааҕын, Өлүөнэ холбоһуктаах пароходствотын акцияларын хонтуруоллааһын республикаҕа тугу биэриэҕин, промышленнай оройуоннарга доруобуйа харыстабылын сайыннарыыга анаммыт дьаһалларга кини тохтоото.

Каадры аттаран туруоруу, саахалланар кутталлаах эргэ дьиэлэртэн дьону көһөрүү, Тиксии уонна Зырянка аэропортарын инникилэрин, олохтоох салайыныы реформатын, Роскосмоһы кытта сыһыан, о.д.а. тустарынан сиһилии кэпсээтэ.

Егор Борисов тыа сирин тупсарыыга, нэһилиэктэри гаастыырга, республика өрүстэригэр муостаны тутууга туһаайыллыбыт быһаарыытын суруналыыстарга сэһэргээтэ.