Баһаар кэмэ саҕаланыаҕыттан ыла Бүлүү улууһугар ойуурга уопсайа 18 баһаар 270 176,70 гектар сири хаппыта. Бүгүҥҥү туругунан 268 548 гектар сиргэ ойуур аҕыс баһаара баара биллэр. Биир - тарҕаммат гына оҥоһуллубут.   

Егор Борисовы кытта көрсүһүүгэ олохтоохтор, нэһилиэктэр баһылыктара, Бүлүү улууһун баһылыга Сергей Винокуров, Россия ЫБММ Саха сиринээҕи кылаабынай управлениетын начальнига генерал Александр Горкун, министиэристибэлэр, биэдэмистибэлэр салайааччылара кытыннылар.

Ойуур баһаарыттан олус хойуу буруо сабардаабытын, онтон сылтаан оҕолору, ыарыһахтары көһөрөргө күһэллибиттэрин, оттуур ходуһалар уокка былдьаммыттарын, эр дьон уонна тиэхиньикэ үксэ уоту умуоруорууга сылдьалларынан оттуур киһи тиийбэтин олохтоохтор эттилэр.

Дьон доруобуйатыгар сыһыаннаан Егор Борисов сылын аайы ыытыллар диспанцеризацияны таһынан быраастар, идэлээхтэр көһө сылдьар биригээдэлэрэ, ол иһигэр Национальнай медицина киинин үлэһиттэрэ бу улуустарга кэлиэхтэрин туһунан эттэ. Оттуур сирэ суох хаалбыттарга тыа хаһаайыстыбатын министиэристибэтэ туох өйөбүл оҥоһулларын толкуйдуур. Егор Борисов хас биирдии түбэлтэ тус-туспа тутуллан ырытыллыа, онно олохтоох дьаһалта быһаччы кыттыа, ол эрэ кэнниттэн бүтэһиктээх быһаарыы ылыллыан сэрэттэ.

Уоту умуруорууга көмөлөһөр соруктаах Бурятияттан, Хакасияттан, Иркутскай уобаластан, Приволжьеттан, о.д.а. дьон кэлэ туралларын кини ыйда.

Дьону-сэргэни кытта көрсүһүүгэ оттуур ходуһалары көдьүүстээхтик туһаныы, мелиорация үлэтэ, нэһилиэктэри тупсарыы, гаастааһын, ойуур баһаарыттан көмүскээһин, о.д.а. тустарынан киэник хабан кэпсэттилэр.

Дьөппөн нэһилиэгин баһылыга Альбина Ионова үлэтэ көдьүүстээҕэ тута билиннэ. Ол курдук, кини оттуур ходуһалар уокка былдьаммыттарын түмүгэр төһө хоромньу тахсыбытын чопчу аахпыт. Ону таһынан баһаар кэмигэр уоту умуруоруу үлэтин күүскэ тэрийбит. Быйыл аҕыс дьиэ киинннэммит ититиигэ холбонуохтаах. «Мин Саха сирэ - XXI үйэҕэ» бырагыраама чэрчитинэн оҕо сада тутуллар. 2014-2015 с.с. саҥа хочуолунай тутуута былааннаммыт. Кэтэх дьиэни тутуу саҕаламмыт. Ону таһынан кини тыа хаһаайыстыбатыгар үлэтин миниистир Иван Слепцов үрдүктүк сыаналаата.