Кистэл буолбатах, Егор Борисов республика баһылыга буолуоҕуттан ыла тыа дьонун олоҕун тупсарыыга күүрүүлээхтик үлэлиир. Бу сыллар усталарыгар республика государственнай бюджетыттан агропромышленнай комплекска ананар үп-харчы кээмэйэ биллэ улаатта. Тыа хаһаайыстыбатын араас салааларын эргиччи өйүүр.

Кини быһылыктыыр кэмигэр РФ-ҕа тыа хаһаайывстыбатны миниистирэ Николай Федоров үстэ кэлэ сырытта, республика федеральнай тус сыаллаах бырагыраамаларга көхтөөхтүк кыттар.

Бааһынай государство бэлэмигэр буолбакка, ырыынак сокуоннарыгар олоҕуран бэйэтигэр табыгастааҕы, барыстааҕы тобулуохтаах, ол туһугар өрө тахсыылаахтык үлэлиэхтээх диэн санаанан Егор Борисов салайтарар. Ити туһунан кини улуустарга сылдьарын былаһын тухары этэр.

Егор Афанасьевич дьону бэйэтин тылыгар киллэрэр, тыа хаһаайыстыбатыгар ырыынак механизманарын олоххо туһаныыга сөптөөх быһаарыылары ылар дьоҕурдаах.

Буолан ааспыт мунньахха тыа хаһаай!ыстыбатын ис дьиҥин билэр дьон мустубуттара тута биллиннэ.

Мунньах кыттыылаахтара тыа хаһаайыстыбатын бородууксуйатын оҥорооччуларга анаммыт дьоҕус кредиттээһин туспа фондатын уонна сүөһүнү иитиини кэҥэтии, саҥардыы фондатын тэрийэри туруорустулар.

Сир ресурсатын көдьүүһэ суохтук туһаныыга, тыа хаһаайыстыбатыгар анаммыт сир тиийбэтигэр, мелиорация үлэтэ ситэритэ суоҕар, о.д.а. сыһыаннаах боппуруостар сытыытык турдулар.Томажня сойууһун саҥа техническэй регламена кэпсэтиһии эргийэр киининэн буолла.

Бааһынай-фермерскэй хаһаайыстыбалар эдэрдэр сэбиэттэрин салайааччыта Александр Фомин   уонна Мэҥэ-Хаҥалас бааһынай хаһаайыстыбатын баһылыга Екатерина Стручкова иһитиннэриилэрэ ордук улахана боҕомтону тартылар.

Фермердэргэ сир тиийбэтин, тыа хаһаайыстыбатын үлэтин тэрийиигэ уопут тиийбэтэ үлэлэригэр элбэх кыһалҕаны үөскэппитин эттилэр. Ол да буоллар, эдэрдэр Чувашия, Новосибирскай уобалас, о.д.а регионнарга сылдьаннар уопут атастаһаллар, бастыҥ үлэттэн холобур ылаллар.

Сүөһүнү, сылгыны иитэр саҥа комплекстары тутуу ороскуота 80 бырыһыанын тыа хаһаайыстыбатын министиэристибэтэ толуйуохтаах. Ити төлөбүр олус бытаарбытын аграрнай паратия чилиэннэрэ аһаҕастык эттилэр.

Кэпсэтиһии, ырытыһыы түмүктэниитэ Егор Афанасьевич Россиҕа Үлэ Дьоруойа Михаил Николаевич Готовцевтыын кэпсэтиитин холобур быһыытынан аҕалла. Дьоруой «Хаачыстыба көрдөрүүтүн хаһан улаатыннарабыт?», - диэн ыйытыгы туруорбут.

Ырыынак усулуобуйатыгар үлэлииргэ бэлэммит суоҕа, бытааннык толкуйдуурбут, тобуларбыт тыа хаһаайыстыбатын кыһалҕатын сүрүн төрүөттэринэн буолбуттар. Ити туһунан Егор Афанасьевич эттэ.

Үөрүөх иһин, кэм-кэрдии уларыйар. Тыа хаһаайыстыбатынан дьарыктаныан баҕалаах эдэр дьон ахсаана элбии турар. Кинилэр өйдөрө-санаалара, олоххо көрүүлэрэ таһыччы атын. Егор Борисов кинилэргэ улаханнык эрэнэрин биллэрдэ.

Саха сирин баһылыгын эбээһинэһин быстах кэмҥэ толорооччу тыа хаһаайыстыбатын сүрүннүүр республика саҥа сокуонугар сыһыаннаах ыйытыкка хоруйдаата. Ити сокуон билигин баар сокуоннартан саамай үчүгэйин, наадалааҕын уонна туһалааҕын сүһэн ылыахтаах.

Тыа хаһаайыстыбатын бородууксуйатан оҥорон таһаарааччылар II съездтэригэр сокуон барылын билиһиннэриэхтэрэ. Сокуон хаһыаттарга бэчээттэниэ уонна дьон-сэргэ киэҥ дьүүллэһиитигэр тахсыаҕа.

Сокуон барылыгар тыа хаһаайыстыбатын араас салааларын өйөөһүн механизманарын биллэ аччатыаҕа. Билигин баар 150 механизмы бородууксуйаны оҥорон таһаарар дьон ылыныыта уустук. Ити механизм испииһэгэ кыччатыллыахтаах уонна өйдөнүмтүө буоулохтаах. Ити туһунан Егор Афанасьевич эттэ.

Урбанизация бара турар процеһыгар үөскээн тахсар кыһалҕалары туоратар туһунан уопсастыба толкуйдуохтааҕын республика баһылыгын э.т. ордук чиҥэтэн бэлиэтээтэ.