Тыа хаһаайыстыбатын сорох боломуочуйалара муниципалитеттарга бэйэлэригэр бэриллибитин кэнниттэн сорохтор ону көдьүүстээхтик туһанан кэккэ ситиһиилэммиттэрэ. Атыттар саҥа дьаһалга бэлэмэ суох буолан биэрбиттэрэ уонна итини республика таһымыгар төттөрү ыларга модьуйаллара эмиэ баар.

«Кистэл буолбатах, баһылыктар сорохторо боломуочуйа ис дьиҥин ситэри өйдөөбөттөр. Боломуочуйа — быраап уонна харчы диэн сыыһа, алҕас санаабыттара. Боломуочуйа — бу туох-ханнык иннинэ эппиэтинэс. Маннык эппиэтинэскэ баһылыктар кыһалҕаны көрүстүлэр», - диэтэ  Егор Борисов.

Тыа хаһаайыстыбатын бородууксуйатын оҥорон таһаарааччылар ортолоругар санаа хайдыһыыта кырата суох, улахан. Туттарыллар үүт сыаната үрдүү турар урукку политика төһө да, көдьүүһэ дуона суоҕун иһин, ордугун тыл эппит дьон чиҥэтэн эттилэр. Буоһатыы, сири тупсарыы, искусственнайдык сиэмэлээһин курдук тыа хаһаайыстыбатын оҥорон таһаарыытыгар субсидияны олохтооһун көҕүлүүр күүс буолбат. Ону олох чахчыта көрдөрөр да, туоһулуур да. Субсидияны кэмиттэн кэмигэр үрдэтии бородууксуйа бэйэҕэ турар сыанатын намтаппат. Тыа дьонугар сороҕор иитимньи эрэ буолар санааны күүһүрдэр.

Ньурба дьонун ортотугар итинник санааны бааһынай хаһаайыстыба баһылыга Михаил Маркусов аһаҕастык эттэ. «Судаарыстыбаттан сотору-сотору өйөбүл, көмө көрдүүр сөбө суох. Саха бааһынайа хаһан да, кимиэхэ да иитимньи буолбатаҕа. Аныгы кэмҥэ бэйэ кыаҕынан олох таһымын үрдэтэр, сөптөөхтүк хааччынар туһунан уһуну-киэҥи толкуйдуохтаахпыт», - диэтэ кини.

Кини кэнниттэн олоҕун усталаах туоратыгар физика учууталынан үлэлээбит Мария Ивановна тылы ылла. Кини 60 сааһыгар «Мин сатаатахпына, эдэрдэр эмиэ кыайыахтара» диэн санаанан салайтаран бааһынай хаһаайыстыбаны тэринэргэ  быһаарыммыт.

5 сүөһүттэн саҕалаабыт хаһаайыстыбата билигин 70 төбөҕө диэри эбиллибит. Кини алта улааппыт оҕолорун, күтүөттэрин, сиэннэрин барыларын бу үлэҕэ түмэ тардыбыт. Мария Ивановна «Ынах үүтэ — тылыгар» диэн норуот бэргэн этиитин батыспыт. Инньэ гынан, турнепыһы, хортуоппуйу, өр сыллаах оту үүннэрэн, сүөһүлэрин аһылыгын арааһын элбэппит. Искусственнай сиэмэлээһин суоҕа кыһалҕаны үөскэтэрин кини ойуччу тутан эттэ. Дьиэ сүөһүтүн ахсааныгар эрэ буолбакка, боруода хаачыстыбатын тупсарыыга кини ураты болҕомтотун уурар.

Мария Ивановна төһө да сааһырдар, толору хааччыллыылаах олорор дьиэлээх, оҥорон таһаарар сирдээх комплексы, аныгы ферманы тутар туһунан толкуйдуур.

Егор Борисов итини истэн баран тыа хаһаайыстыбатын миниистирэ Иван Слепцовка туһаайан: «Иван Иванович, атын дьыаланы тохтотон эр. Мария Ивановнаҕа көмөлөс», - диэтэ. Оттон саалаҕа лыык курдук мустан олорор дьоҥҥо: «Маннык дьоҥҥо көрдөөбөтөхтөрүн да үрдүнэн, көмөлөһүөхпүн баҕарабын», - диэтэ.

Егор Борисов мунньах түмүктэниитэ ким эрэ туораттан кэлэн барытын толкуйдаан, баһааран, бэлэмнээн, оҥорон биэрэрин күүтэн олорбокко, баар кыһалҕаны туоратарга, саҥаны саҕалыырга былаас үлэһиттэрин ыҥырда. «Оччотугар эрэ ситиһиилэниэхпит», - диэтэ кини.