Оробуочай бөлөх Үөһээ Бүлүүгэ, Сунтаарга сылдьан баран Ньурбаҕа үлэтин «Күндээдэ» агрофирматтан саҕалаата. Хаһаайыстыба от үлэтигэр бэлэмин билистэ, агрофирма эбийиэктэрин көрдө, тирээн турар боппуруостары ырытыста.

Сарсыннытыгар Маалыкайга Ст. Васильев аатынан сылгы собуотугар сылдьан үлэ хаамыытын көрдө-иһиттэ. Маалыкай түбэтин тыа хаһаайыстыбатын тэрилтэлэрин үлэһиттэрэ, нэһилиэктэр баһылыктара кыттыылаах мунньах ыытта. Мунньахха улуус баһылыга Б.Н. Попов, оройуон депутаттарын сүбэтин бэрэссэдээтэлэ С.И. Евсеев, Ил Түмэн дьокутаата В.М. Прокопьев, Ньурба улууһун тыатын хаһаайыстыбатын департаменын салайааччы А.И. Эверстов кытыннылар.

Сүрүн кэпсэтии сылгы собуотун кэскилин, хаһаайыстыба үпкэ туругун чөлүгэр түһэриигэ судаарыстыба көмөтө наадатын, сайдыы хайысхаларын торумнааһын тула барда. Миниистир Александр Артемьев тыа сирэ сайдарыгар бырабыытылыстыба, олохтоох былаас уонна нэһилиэнньэ бары биир санаанан салайтаран үлэни ыыталлара үтүө түмүктээх, сөптөөх быһаарыныылаах буоларын тоһоҕолоон бэлиэтээтэ. Көрсүһүү бэрт сэргэхтик барда, миниистиргэ элбэх боппуруос бэрилиннэ, оруннаах этиилэр да киирдилэр. Нэһилиэнньэ үүт уонна эт субсидиятын, тыа сиригэр эдэр специалистар кэлиилэрин, Мэҥэдьэк сылгытыгар племенной үлэ, тыа сирин инники сайдыытын туһунан ыйыталаста.

Бэс ыйын 4 күнүгэр Александр Артемьев оробуочай бөлөҕө Ньурба куорат тыа хайааһыстыба тэрилтэлэрин үлэтин кытта билистэ, сүрүн эбийиэктэргэ сырытта. Ньурбатааҕы птицефабрикаҕа куурусса сымыыттыыр сыаҕын, үлэҕэ киллэриллиэхтээх убойнай уонна эдэр кууруссалары тутар сыахтары көрдө, үп-харчы өттүнэн көмө анал бырагыраамаларга киирсэн үлэни ыыттахха эрэ кэлэрин эттэ.

Салгыы миниистир «Байар» ТХПК сырытта. Улуус баһылыга Борис Поповтуун тэрилтэ дьиэтин боппуруоһун быһаарыста. Саҥа модульнай комплекс тутуутун туһунан кэпсэттилэр. Тыа хаһаайыстыбатын бородууксуйатын оҥорон таһаарар тэрилтэ хайаан да инникилээх, туруктаах буолара ситиһиллиэхтээх диэн түмүккэ кэллилэр.

«МТС-Агро» тэрилтэ үлэтин билсэн баран, миниистир үлэ хаамыытын биһирээтэ, эдэр салалта боччумнаах дьаһаныытын сэргээтэ.

Александр Еремеевич «Бэс Атахха» тутуллубут 100 миэстэлээх саҥа хотоҥҥо, үлэҕэ киллэриллиэхтээх убойнай сыахха, Куочай оттуур ходуһатыгар сырытта, хаһаайыстыба тиэхиньикэтин көрдө, сайылык олохтоохторун кытары кэпсэттэ.

Министиэристибэ департаменнарын салайааччыларыгар «МТС-Агро» тэрилтэни кытта бииргэ үлэлииргэ уонна хонтуруоллуурга сорудахтаата. Сүрүн боппуруостарга тута быһаарыы ылынна.

Салгыы миниистир Антоновка нэһилиэгэр Кыталыктаахха 100 дьиэ тутуллуохтаах сиригэр сырытта. Манна тыа сирин олохтоохторугар дьиэ туттууларыгар көрүллэр субсидия тула кэпсэтии барда. Александр Еремеевич «Куочай» уонна «Муоһааны» нүөлсүтэр систиэмэлэри көрдө. Ньурбаҕа нүөлсүтүүгэ болҕомто уурулларын биһирээтэ.

Бүгүн Ньурба оройуонун дьаһалтатын мунньахтыыр саалатыгар улуус салалтата, нэһилиэктэр баһылыктара, тыа хаһаайыстыбатын исписэлиистэрэ, хаһаайыстыбалар бэрэстэбиитэллэрэ кыттыылаах улууска сырыы түмүгүнэн улахан мунньах ыытылынна.