Оробуочай бөлөххө министиэристибэ департаменнарын салайааччылара Андрей Андреев, Алексей Герасимов, Афанасий Семенов уонна «СахаАгроПродукт» ӨТХПХБК бырабылыанньатын бэрэссэдээтэлэ Константин Тимофеев, «Туймаада-Лизинг» ААУо генеральнай дириэктэрэ Дмитрий Махаров бааллара. Маннык улахан хамаандалаах, маннык уһуннук биир даҕаны миниистир биһиэхэ сылдьа илигэ.

Александр Артемьев салайааччылаах бөлөх Түбэй Дьаархантан саҕалаан Күүкэй, Кутана, Элгээйи, Күндэйэ нэһилиэктэринэн, дьикти айылҕа баайдаах Туус Кэнэлинэн, көнө-налыы хонуулаах Хочо сиринэн, кэскиллээх Кириэстээҕинэн, бурдуктаах Табаҕа бааһынатынан сылдьан сирбитин-уоппутун кытта билистэ, тыа сирин үлэһит дьонун кытта ирэ-хоро кэпсэттэ.

Миниистир Сунтаарга сырыытынан түмүк мунньаҕын Сунтаардааҕы техническэй колледж мунньахтыыр саалатыгар ыытта. Онно улуус дьаһалтатын эппиэттээх үлэһиттэрэ, нэһилиэктэр баһылыктара, тыа хаһаайыстыбатын специалистара, бэтэрээннэрэ кыттыыны ыллылар.

Мунньах кэнниттэн Александр Еремеевичтыын кэпсэттим:

– Тыа хаһаайыстыбатын туругун хайдах сыаналыыгын?

– Үлэм хайысхатынан тас дойдуларга, Россия да регионнарыгар элбэхтик командировкаҕа сылдьабын. Онно көрдөххө, тыа хаһаайыстыбата бизнескэ кубулуйан эрэр. Ол аата үптээх-харчылаах дьон инвестор буолан, сүөһү, сибиинньэ иитиитинэн, оҕуруот аһынан дьарыктаналлар. Биһиги эмиэ оннугу киллэриэхпитин баҕарабыт эрээри, кыалла илик. Тыа сиригэр чахчы үлэлиэн баҕалаах дьоммутун өйөөтөхпүтүнэ, биллэн турар, үлэбит-хамнаспыт тахсыылаах буолуо дии саныыбын.

– Сунтаарга кэлиигит айылҕа тиллиитин кытта дьүөрэлэстэ. Ол үтүө сайын чинчитэ буоллар ханнык.

– Кырдьык, Сунтаарга сырыыбыт, хаһаайыстыбалар сааскы түбүктэригэр түбэһэн, табылынна дии саныыбын. Элбэх сири-уоту көрдүбүт, үлэ дьонун көрсөн кэпсэттибит. Бэйэм тыа хаһаайыстыбатын салайааччытын быһыытынан элбэх толкуйдаах баран эрэбин.

– Олортон билиһиннэрэ түһүөҥ буолаарай?

– Сунтаар дьоно үлэлиэн баҕалааҕын бэлиэтиибин. Эдэр ыччаты көҕүлээн, сыһыаран, улуус ис кыаҕын туһаныахха наада. Биир хайгыы көрбүтүм – Тойбохойго эдэр уолаттар бэйэлэрэ тэринэннэр тимир иһэрдэллэр, таһаҕас тиэйэллэр, хотон, күрүө туталлар эбит.

– «Кириэстээх» ТХПК үлэтин-хамнаһын туһунан миниистир санаатын сунтаардар истиэхтэрин баҕараллар.

– «Кириэстээх» ТХПК – өрөспүүбүлүкэҕэ Нөмүгүтээҕи агрофирма кэнниттэн биир бөдөҥ хаһаайыстыба. Салайааччы Владимир Егоровы, хаһаайыстыба үлэһиттэрин кытта миэстэтигэр көрсөн ирэ-хоро кэпсэттибит. Базаны барытын көрдүбүт. Табаҕа бааһыната Аммам хатыҥнаах чараҥнарын санатта. Олус бэрт бырайыак эбит. Маны сөргүтэн, туһаҕа таһаарар туһугар күүскэ үлэлиэххэ. Тиэхиньикэнэн хааччыллыыга көмөлөһүөхпүт. Сүөһү аһылыгын манна үрдүттэн төһө баҕарар бэлэмнээн, элбэх үүтү-эти оҥорон таһаарыахха сөп эбит. Ыаллыы Мииринэй, Ленскэй улуустарыгар Сунтаар, чуолаан «Кириэстээх» хаһаайыстыба оҥорон таһаарбыт бородууксуйатын батарар ситими олохтуохха.

Сунтаар улууһугар 8 соҕотуопка тэрилтэтэ баар. Балары түмэн киинниир табыгаһа суох курдук көрдүм. Маны улуус салалтата сүрүннүө дии саныыбын. Сунтаарга ырыынак былдьаһык буолбута биир өттүнэн үчүгэй, ол аата күрэстэһии баар.

Сунтаардар ис кыаххыт улахан: киэҥ сир-уот, бааһына баар. Улууска тыа хаһаайыстыбатын сайдыытыгар саҥа хамсааһын тахсарыгар кыттыһан, үлэбит түмүгэ көстөрүгэр баҕалаахпыт. Сунтаар үлэһит дьоно тыа хаһаайыстыбатын салаатын өссө үрдүк таһымҥа таһаарыаххытыгар эрэнэбин.