Мунньахха 2012-2014 сс. өрөспүүбүлүкэҕэ саҥа саҕалаан эрэр фермердэри уонна бааһынай (фермерскай) хаһаайыстыбалар базаларыгар дьиэ кэргэн ынах сүөһү ферматын тутуутун өйөөһүҥҥэ икки федеральнай бырагырааманы олоххо киллэрии түмүктэрин ырыттылар.

Мунньах кыттыылаахтара бырагыраамалар үтүө дьайымтыалаахтарын, бу бырайыакка үлэлэһии фермерскэй хамсааһыҥҥа сэргэхсийиини таһаарбытын ыйдылар.

Үс сыл устата саҥа саҕалаан эрэр фермердэргэ бэриллэр граҥҥа 369 сайаапка киирбититтэн, граны 151 фермер ылбыт, дьиэ кэргэн ынах сүөһү ферматын туттууларыгар 86 сайаапка киирбититтэн, граны 47 хаһаайыстыба ылбыт. Инникитин федеральнай граннары ылбыттар үлэлэрин уопутун киэҥник тарҕатыыга министиэристибэ уонна ассоциация туһааннаах үлэни ыытыахтара.

Көрсүһүү кэмигэр фермердэр миниистиргэ тирээн турар кыһалҕаларын этиннилэр, тыа хаһаайыстыбатын производствотын тэрийии туһунан бэйэлэрин санааларын үллэһиннилэр, ону сэргэ тыа хаһаайыстыбатыгар анаммыт сири үллэрии, аграрнай бырайыактарга кыттыы, субсидияны биэрии быраабылатын, быстах кэмнээх үлэни тэрийии туһунан ыйытыылары биэрдилэр.