Бу тэрээһин Карелия республикатын киин куоратыгар — Петрозаводскайга ыытыллар.

Сокуону оҥорооччулар сэбиэттэрин мунньаҕар элбэх боппуруос көтөҕүллүөҕэ. Ол курдук, президет 2013 сыллааҕы анал этиитэ, ыам ыйынааҕы ыйаахтар төһө туолбуттара, Крымы, Севастополь куораты РФ састаабыгар киллэрии, олохтоох бэйэни салайыныыга баар кыһалҕалар — болҕомто эргийэр киининэн буолуохтара.

Петрозаводскайга ону таһынан монокуораттар нус-хас сайдыыларын хааччыйарга аналлаах мунньах буолуоҕа.

Федерация Сэбиэтин председателэ  Валентина Матвиенко  уонна Госдума председателэ  Сергей Нарышкин дакылааттары оҥоруохтара. Правительство председателин солбуйааччы Аркадий Дворкович, федеральнай миниистирдэр, регионнар салайааччылара, дьыалабыай эргимтэ бэрэстэбиитэллэрэ кыттыахтара.

Муус устар 26 күнүгэр СР парламенын председателэ  Александр Жирков РФ сокуону оҥорооччуларын чилиэннэрин кытта көрсүһүүгэ Санкт-Петербурга сырытта.