Владимир Путин дьон-сэргэ быраабы билиитин үрдэтэргэ, сокуон барылын дьүүллэһиигэ кытталларын, министиэристибэлэргэ уонна биэдэмистибэлэргэ уопсастыбаннай сэбиэттэри үөскэтэллэригэр соругу туруорда: «Дойдубутугар демократия сайдарыгар, олох бары эйгэтигэр бэрэбиэркэлэммит уонна сөптөөх быһаарыыны ыларга уопсастыбаннай сэбиэттэр дьоһун кылааттарын киллэрэллэригэр улаханнык эрэнэбин», - диэтэ. 

Палаата сэкэритээрэ  Александр Бречалов палаата үлэтин сүрүн сүнньүгэр тохтоото. Былаас уорганын кытта хардарыта кэпсэтии, дьайсыы олохсуйарыгар палаата далаһа ууруохтааҕын кини чиҥэтэн эттэ.

Палаата хамыыһыйаларын бэрэссэдээтэллэрэ уопсастыбаннай хонтуруол, уопсастыбаннай сэбиэттэри тэрийии, олохтоох бэйэни салайыныы, ДЬКХ, экология, о.д.а. боппуруостарын сытыытык туруорбуттар. Уопсастыбаннай палаата — дьоҥҥо-сэргэҕэ дьайар аналлааҕын В.Путин бэлиэтээн эппит.

Саха сириттэн ити көрсүһүүгэ тиийбит Марина Богословская СИА-ҕа эппиитнэн, РФ уопсастыбаннай палаататын саҥа састаабыгар 18 хамыыһыйа тэриллибит, экономическай блок биллэ күүһүрбүт. «Үс хамыыһыйа инвестиция, дьоҕус, орто предпринимательство кыһалҕаларын быһаарыахтаах», - диэтэ кини.

Саха сирин бэрэстэбиитэлэ бэйэтин үлэтин чэрчитинэн социальнай инфраструктура уонна ДьКХ хамыыһыйатыгар киирбит. «Бу эйгэ кыһалҕаларын быһаарыы биһиги республикабытыгар эмиэ инники күөҥҥэ тутуллар. РФ уопсастыбаннай палаататыгар киирэр дьон туһаайан этиитин 75% биһиги хамыыһыйабыт быһаарар. Онон, иннибитигэр улахан үлэ күүтэр, билигин ити хамыыһыйаҕа 5 киһилээх», - диэтэ Марина Богословская.

Ону таһынан Марина Богословская дьоҕус, орто бизнес, инвестиция, уопсастыбаннай хонтуруол хамыыһыйатыгар киирэр.