Егор Борисов оҥорон таһаарааччылары кытта техническэй оборудованиены саҥардыыны уонна биир кэлим стандартка сөп түбэһиннэриини ырыттылар.

Араас таһымнаах коопрециялааһын ситэриллибит схематын дьүүллэстилэр. Егор Афанасьевич бу ойууга көстөр схема биһиги өрөспүүбүлүкэбитигэр эрэ баарын уонна олус табыгастааҕын, эҥкилэ суоҕун бэлиэтээн эттэ. (Ойууну көр).

Өрөспүүбүлүкэтээҕи таһымнаах «Сахаагропродукт» кооперативка аһы-үөлү батарыыга сүрүн сорук сүктэриллибитин, онон тэрилтэ эргитэр үптээх-харчылаах буолуохтааҕын туһунан Егор Борисов эттэ.

Кини быйылгыттан саҕалаан батарыы систиэмэтэ булгуччу сөргүтүллүөхтээҕин бэлиэтээтэ. «Идэһэни күргүөмүнэн өлөрүү кэмигэр дьон эти хото туттарыаҕа. Ону тэриллиилээхтик атыылаһары тэрийэхтээхпит», – диэтэ Ил Дархан.

Сэтинньи 25-гэр диэри «Сахаагропродукт» улуустааҕы тэрилтэлэрин үлэтин анализтыырга тыа хаһаайыстыбатын, ас-үөл политикатын министиэристибэтигэр, соҕотуопкалыыр кииннэммит систиэмэни тэрийэргэ, эт-ас эргиирин олохтуурга үп-харчы булары өрөспүүбүлүкэ бырабыыталыстыбатыгар Е.Борисов сорудахтаата.

Мунньахха бырабыыталыстыба бэрэссэдээтэлин бастакы солбуйааччы Петр Алексеев, тыа хаһаайыстыбатын, ас-үөл политикатын миниистирэ Александр Артемьев, экономика миниистирэ  Валерий Максимов,  «Сахаагропродукт» тэрилтэ генеральнай дириэктэрэ  Константин Тимофеев, Мэҥэ-Хаҥалас, Нам,  Горнай, Таатта, Чурапчы, Амма, Бүлүү, Үөһээ-Бүлүү, о.д.а. улуустар бэрэстэбиитэллэрэ кытыннылар.

Тыа сирин кэлимсэ сайыннарыыга анаммыт биэс сылга тыа хаһаайыстыбатын бородууксуйатын оҥорон таһаарыы, астааһын уонна батарыы боппуруостарыгар ураты улахан болҕомто ууруллуохтааҕын туһунан Егор Борисов ойуччу тутан бэлиэтээтэ.

Ити бигэтик олоххо киирэригэр технологическай хааччыллыы, материальнай-техническэй базаны хаҥатыы, бородууксуаны атыылааһын уонна батарыы систиэмэтин сайыннарыы инники күөҥҥэ тутуллуохтааҕын кини чиҥэтэн эттэ.