Егор Борисов систиэмэ диэн кини министиэристибэлэр, госкэмитиэттэр, департаменнар ситэриилээх былаас уорганыгар киирэллэрин быһаарда.

«Билигин биһиэхэ баар систиэмэ көдьүүстээхтик үлэлиир. Үлэни тупсарар туһугар улахана суох улартыылары киллэриэхпит», - диэтэ кини.

Бырабыыталыстыба саҥа састаабын үөскэтиигэ сыһыаннаан кини бырабыыталыстыба бэрэссэдээтэлин дуоһунаһыгар Галина Данчикова кандидатуратын киллэрбитин, ону депутааттар утарсыыта суох өйөөбүттэрин туһунан эттэ. Депутааттар алтынньы 1 күнүгэр буолар 10-с пленарнай мунньахтарыгар кинини дуоһунаска бигэргэтиигэ сөбүлэҥнэрин биэриэхтэрин, оттон алтынньы 8-9 күннэригэр ыытыллар пленарнай мунньахтарыгар бырабыыталыстыба бэрэсэдээтэлин солбуйааччылар уонна миниистирдэр кандидатураларын киллэриэҕэ.

Быыбарга кини сүрүн утарсааччыта буолбут Эрнст Березкин бырабыыталыстыбаҕа дуоһунаска тиксиэн сөбүн дуу, суоҕун дуу туһунан ыйытыкка кини маннык диэтэ:

«Дуоһунаска аныырга киһи дьыалабыай хаачыстыбатын уонна идэтийиитин туохтааҕар да үрдүктүк тутабын. Өрөспүүбүлүкэ бырабыыталыстыбатыгар коммунистар, сиэрдээхтэр да бааллар, онон, политическай көрүү улахан оруолу ылбат диэн хаста да этэн турардаахпын. Бары биир сыалы-соругу тутуһан үлэлиибит. Эрнст Березкин туһунан этэр буоллахха, кини бэрэссэдээтэли солбуйааччынан, үп миниистиринэн үлэлээбитэ. Онон, бырабыыталыстыба үлэтигэр буһуу-хатыы оскуолатын ааспыт, туругутуллубут киһи. Быыбар иннинэ киллэрибит сайабылыанньаларын ааҕыстахха, кини төһө туһалыан дуу, туһалыа суоҕун дуу туһунан билэбин. Бу — мин боппуруоһум диэхпин сөп», -  диэтэ өрөспүүбүлүкэ баһылыга.