«Былаас уорганыгар дьон көрдөһүүтүн сорох биэдэмистибэлэр үксүгэр суругунан көлбөрүтүнэн кэбиһэллэрэ баар чахчы. Онон, мин бу систиэмэни төрдүттэн уларытар туһунан быһаарыыны ылынным. Бырабыыталыстыба уонна баһылык дьаһалтатыгар дьон көрдөһүүлэринэн тус сыаллаахтык дьарыктанар отдел баара. Билигин дьон ыйытыгын, көрдөһүүтүн тилэри ырытар структура үөскүөҕэ. Ити тэрилтэ хас биирдии ыйытыкка толору уонна ситэри хоруйу биэриэҕэ», - диэтэ  Егор Борисов. Министиэристибэлэргэ уонна госкэмитиэттэргэ итиниэхэ анаммыт сорудаҕы биэрдэ.

Егор Борисов баһылык уонна бырабыыталыстыба дьаһалтатын үлэтин ис хоһооно уларыйыан туһунан эрдэ этэн турардаах. Ситэриилээх былаас үлэтин хонтуруолугар, өрөспүүбүлүкэ бырагыраамаларын туолуутугар, баһылыктарга туһуламмыт сорудахтарга, социальнай эйгэни, экономиканы, о.д.а. олох салааларын тохтоло суох кэтээн көрүүгэ мантан ыла ураты болҕомто ууруллуоҕа.