Аныгы кэмҥэ иһитиннэриини, информацияны киэҥник тарҕатар тиһиктэр үлэлэрэ ураты улахан суолталаах. Пресса, телевизионнай уонна араадьыйа биэриилэр, интернет-таһаарыылар биһигини тиһэх сонуннары кытта билиһиннэрэллэр, олох үөһүгэр туталлар.

Информацияны киэҥник тарҕатар бүгүҥҥү тиһиктэр техническэй өттүнэн уларыйаллар уонна тупсарыллаллар. Хаһыаттар уонна телевидение, араадьыйа биэриилэрэ Интернети, социальнай  ситимнэри баһылыыллар.

Маннык элбэх биэриилээх, иһитиннэриилээх буоламмыт, сахалар, биһиги өрөспүүбүлүкэҕэ, Россияҕа уонна омук дойдуларыгар буолар быһыы-майгы үөһүгэр сылдьабыт, тугу интэриэһиргиирбитин уонна долгутар ыйытыктарбытыгар толору уонна кырдьыктаах хоруйу ылар, билэр кыахтаахпыт.

Суруналыыстар сыралаах үлэлэринэн хаһыаттар, сурунааллар балаһаларыгар, сайтарга, теле-араадьыйа ханаалларыгар сырдатыллар сытыырхайан турар быһыыны-майгыны киэҥник дьүүллэһэбит, ырытабыт. Ону таһынан суруналыыстар үлэлэрэ уопсастыбаннай санааны үөскэтэр, өрө тутуллар хайысханы сүрүннүүр уратылаах.

Бэчээт, теле-араадьыйа эйгэлэригэр олохторун анаабыт бэтэрээннэрбитигэр муҥура суох ытыктабыл уонна махтал тылларын тиэрдэбит. Аныгы көлүөнэ суруналыыстар иннилэригэр аҕа көлүөнэ олохтообут үтүө үгэстэрин, уопуттарын харыстыыр, хаҥатар уонна байытар сорук турар.

Былаас уонна информацияны киэҥник тарҕатар тиһиктэр хардарыта дьайсыылаах үлэлэрэ инникитин уопсастыбаны биир сомоҕо гына түмэригэр  бүк эрэнэбин.

Күндү доҕоттор! Айар үлэҕит айымньылаах буоллун, саҥа санаалары, толкуйдары олоххо киллэриҥ, доруобуйаны, уйгу-быйаҥ олоҕу , үлэҕитигэр үрдүк ситиһиилэри баҕарабын!

Саха Өрөспүүбүлүкэтин Ил Дархана Е.А.Борисов