Сэбиэскэй Сойуус Германияҕа саба түспүтүн курдук тыл-өс тарҕаммыт кэмигэр Егор Борисов үүнэр көлүөнэни патриот тыыныгар иитиини күүһүрдэр соруктаах.

«Кыайыыны уһансыбыт, эйэлээх олоҕу эргиппит дьоммутугар туох иһин махтанарбытын ыччат билиэх тустаах», – диэтэ кини.

Аҕа дойду Улуу сэриитигэр Кыайыы 70 сылыгар анаан ыытыллар тэрээһиннэргэ, ол иһигэр ыам ыйын 9 күнүгэр Дьокуускайга уонна улуустарга буолар параадтарга оскуола үөрэнээччилэрэ, устудьуоннар кыттыахтарын сөп. «Бу күн хас биирдии оҕо  өйүгэр-санаатыгар, сүрэҕэр-быарыгар иҥэн  хаалыаҕа», – диэтэ Егор Борисов.

Балаҕан ыйыгар Кыайыы сылын түмүктэниитин эмиэ Кыайыы күнүн курдук күргүөмүнэн бэлиэтиэхпит.

Саха сирин баһылыга бэтэрээннэргэ, кинилэр хорсун быһыыларын үйэтитиигэ, ыччаты патриот тыыныгар иитиигэ ураты болҕомто ууруоллуохтааҕын чиҥэтэн эттэ.