Дьыл кэмиттэн тутулуктанар үлэлэргэ, ол курдук ыһыы үлэтин, халааны утары үлэни, навигацияҕа бэлэмнэниини, оҕо сайыҥҥы сынньалаҥын тэрийиини, эһиилги кыстыкка бэлэмнэниини о.д.а. бара турар үлэлэри Егор Борисов бэрэбиэркэлээтэ.

Егор Борисов маҕаһыыннары аһынан хааччыйыыга сакааһы кэмигэр оҥорууга болҕомтотун уурда.

Өрөспүүбүлүкэ баһылыга Улуу Кыайыы 70 сылын көрсөргө бэлэмнэниини, бэтэрээннэргэ ураты болҕомтону уурууну кэпсэтии киинигэр тутта.

Өрөспүүбүлүкэ баһылыга Россияҕа биллэриллибит Литература сылыгар саха классик суруйааччыларын айымньыларын 126 туома бэчээттэнэн тахсыаҕын, П.А.Ойуунускай аатынан Литературнай музейга хапытаалынай өрөмүөн ыытыллыаҕын, о.д.а. тустарынан эттэ. Ону таһынан Россия Суруйааччыларын сойууһун сэкирэтирийээтин мунньаҕа Дьокуускайга бэс ыйыгар ыытылларын иһитиннэрдэ.

Кириисиһи утары миэрлэргэ сыһыаннаан Егор Борисов федеральнай киини кытта үлэ күүһүрүөхтээҕин ыйда.

Миниистирдэр уустук боппуруостары быһаарыыга бэйэлэригэр эппиэтинэһи ылалларыгар эттэ.«Кимиэхэ барытыгар бэрт буола сатыыр политиктар, салайааччылар суох буолбатахтар. Мин хамаандабар үлэлиир дьон эппиэтинэһи бэйэлэригэр толлубакка ылыахтаахтар», – диэтэ Борисов.

Бырабыыталыстыба бэрэссэдээтэлин бастакы солбуйааччы Павел Маринычев өрөспүүбүлүкэ экономическай туруга билиҥҥитэ бигэтин бэлиэтээтэ.

Премьер-миниистир Галина Данчикова эппитинэн, бырабыыталыстыба отчуотун кэмигэр дьон ордук доруобуйа харыстабылын, ОДьКХ боппуруостара долгутарын ыйбытын эттэ.

Сибээс, Интернет хаачыстыбата, почта үлэтэ  мөлтөҕүн, ордук хоту улуустарга Росреестр бэрэстэбиитэлэ суоҕун, о.д.а. туһунан дьон санаатын үллэстибитин бырабыыталыстыба чилиэннэрэ эттилэр.