Егор Борисов: Сахам дьонун кытары атах тэпсэн олорон сэһэргэһэрбиттэн сүрдээҕин астынабын

Ааспыт субуотаҕа, ахсынньы 22 күнүгэр, Саха Республикатын Ил Дархана Егор Борисов Хаҥалас улууһун I Дьөппөнүгэр үлэлээтэ. Күн бастакы аҥарыгар П.С.Скрябин аатынан орто оскуолаҕа “Нэһилиэк” бырайыак кыттыылаахтарын кытта көрүстэ. Күнүстэн киэһэ культурнай-спортивнай комплекска олохтоохтору кытта атах тэпсэн олорон ирэ-хоро сэһэргэстэ, дьон мунаарар, быһаарыыны эрэйэр боппуруостарыгар хоруйдаата. Манна чугастааҕы Күөрдэмтэн, Хачыкааттан бэрэстэбиитэллэр кэлэн эмиэ кыһалҕаларын этиннилэр.


Дьөппөннөр Егор Афанасьевичка элбэх араас ыйытыыны – тыа хаһаайыстыбатыгар үлэлиир дьону бюджеттан хамнастыыр сатаныа дуо диэнтэн саҕалаан урутаан сайдар сирдэргэ республика киирсэр дуо, Дьокуускайга, Аллараа Бэстээххэ кэлии омуктар олус элбэхтэр диэҥҥэ тиийэ – биэрдилэр. Уонна олорго Ил Дархан санаатын, тус сыһыанын иһиттилэр.
Егор Афанасьевич ыйытыыларга хоруйдууругар хортуоппуйу, хаппыыстаны, үүтү, эти, од.а. атыылаһыыны мэктиэлиир тиһиги олохтуохтаахпыт, манна туһааннаах үлэ барар диэтэ.
Ыаллар кииннэммит ититэр тиһиккэ холбонууларыгар коммунальнай хаһаайыстыбатаҕа бюджеттан дотация көрүллэрин эттэ. Тиһиги тардыы эмиэ үгүөрү үбү эрэйэр. Бэл сэбиэскэй кэмҥэ улахан ночооттооҕунан ааҕыллан, чааһынайдары ититэр тиһиккэ холбооһун бобуллара. Онон, хос ороскуотурбат инниттэн, ититэр тиһиги тардыыга государство кыра дохуоттаахтарга, ветераннарга уонна хоту улуустар олохтоохторугар эрэ көмө оҥорор. Егор Афанасьевич сылааска холбонуу барыстааҕын билэр дьон харчы бырахсан ититэр тиһиги бэйэлэрин күүстэринэн тардыбыттарын, оннук сүүһүнэн ыал сылааска холбоммутун холобур аҕалла. “Оттон государство үп көрөрүн күүттэххитинэ, баһаалыста, уон сыл, сүүрбэ сыл кэтэһиэххит”, - диэтэ.

Салгыы Аҕа баһылык тыа сиригэр капитальнай тутууну ыытарга дьаһалы бары өттүнэн үчүгэйдик толкуйдаан ылынар сөбүн ыйда. Манна кэскиллээхтэрин итэҕэппит, биһиги үүнүөхпүт-сайдыахпыт, ыччаппыт олохсуйуо диэн сарсыҥҥыны санаан үлэлиир-хамсыыр нэһилиэктэргэ көмөлөһөр сөп диэн эттэ.
Кэпсэтиини түмүктүүрүгэр Егор Афанасьевич быыбарга норуотум итэҕэйэн салгыы үлэлиир кыаҕы биэрбитигэр махтанабын, дьонум-сэргэм иннигэр улахан эппиэтинэстээхпин өйдүүбүн диэтэ. “Оҕо эрдэхпиттэн эппиэтинэһи өрө тутан кэлбит киһибин, үлэбин-хамнаспын эппиэтинэс диэн өйдөбүлүнэн сирдэппитим. Ол иһин эппиэтинэс боппуруоһун туруорар кэм кэллэ дии санаан, соторутааҕыта Ил Түмэҥҥэ Анал этиибэр ону ыйан турабын”, - диэтэ. Онон, салгыы сайдыахпытын баҕарар буоллахпытына, хас биирдиибит тус эппиэтинэһин өйдүөхтээх, оччотугар үгүс кыһалҕаны туоратар кыахтаныахпыт диэн бэлиэтээтэ. “Уонна түмсүүлээх буолуохха. Арыт ордук санаһарбыт олус күүскэ көстөн ааһааччы. Ити саха биир уратыта эбит. Атын омуктарга ону көрбөппүн ээ. Баҕар, үчүгэйгэ талаһарбытыттан итинник быһыыланарбыт буолуо эрээри, итини мин сэҥээрбэппин”, - диэн аһаҕастык билиннэ.
Билигин чуолаан тыа сиригэр үлэ-хамнас сэргэхсийэн эрэрин ыйан туран, онно ирдэбиллэри киһиэхэ өйдөнөр курдук оҥоруохха, дьоммут-сэргэбит буккулара-тэккиллэрэ элбэх, сыллата саҥаны киллэрэ сатыыр курдукпут диэтэ. Олохтоох салалтаҕа саҥа үчүгэй салайааччылар кэлитэлээбиттэрин, онон үлэлииргэ чэпчээн эрэрин, урукку курдук буолбатаҕын бэлиэтээтэ.

Түмүккэ сахам дьонун кытары маннык атах тэпсэн олорон сэһэргэһэрбиттэн сүрдээҕин астынабын, быыс булларбын эрэ көрсөн кэпсэтэбин, онтон күүс-күдэх ылынабын диэн билиннэ. Дьөппөннөргө аһаҕастык, үтүө санаалаахтык сэһэргэспиттэригэр махтанна.