Егор Борисов атырдьах ыйын 12 күнүгэр Үрүҥ Хайаҕа ыыппыт мунньаҕар Абыйга олохсуйар дьон ахсаана аҕыйыы турарын, оҕо төрөөһүнэ аччаабытын, үлэтэ суох буолуу элбээбитин, итинтэн сылтаан арыгылааһын үксээбитин туһунан эттэ.

Егор Борисов улуус былааһын уоргана көхтөөхтүк үлэлииригэр, олорор дьиэни тутуу, предпринимательствоны, тыа хаһаайыстыбатын өйүүр өрөспүүбүлүкэтээҕи бырагыраамаларга кыттарыгар этии киллэрдэ. Табаны, сылгыны иитиигэ, дьоҕус уонна орто бизнеһи сайыннарыыга ыаллыы сытар улуустарын уопуттарын үөрэтэригэр уонна туһалаах, үтүө өттүн сүһэн ылан олоххо туһанарыгар эттэ.

Улуус өрөспүүбүлүкэ бырагыраамаларыгар кыттарын, предпринимателлэр уонна тыа хаһаайыстыбатын бородууксуйатын оҥорон таһаарааччылар араас граннарга кытталларыгар докумуону хомуйууга, о.д.а бырабыыталыстыба көмөлөһөрүгэр, бу улууһу ураты болҕомтоҕо ыларын сорудахтаата. Ону таһынан Абый улууһугар олорор дьиэҕэ үөскээбит кыһалҕаны бырабыыталыстыба таһымыгар быһаарар уолдьаспытын  ыйда.

Министиэристибэлэргэ чопчу сорудахтар бэрилиннилэр. Оннук, ДьКХЭ балаҕан ыйын 15 күнүгэр диэри Үрүҥ Хайа саҥа канализационнай ситимин үлэлэтэрин, доруобуйа харыстабылын министиэристибэтэ Абый улууһугар Арктиканы бүтүннүүтүн хабар көһө сылдьар коллегияны ыытарын модьуйда.

Егор Борисов Абый улууһугар сырыытыгар бырабыыталыстыба вице-премьерэ Феодосия Габышева, министиэристибэлэр уонна биэдэмистибэлэр салайааччылара, «ДЬКХ» ГУП генеральнай дириэктэрэ Александр Ноговицын сылдьыбыттарын туһунанЕгор Борисов официальнай саайтыгар суруллар.