Олорор саҥа дьиэни, оскуоланы, оҕо садын. о.д.а. социальнай суолталаах эбийиэктэри тутуу, нэһилиэнньэни ыраас иһэр уунан хааччыйыы, тобоҕу хомуйуу, интернет хаачыстыбатыгар сыһыаннаах ыйытыктары Амма дьоно сытыытык туруордулар.

Амма улууһа тыа хаһаайыстыбатын өрө туппут улуус буоларынан, бу эйгэ тула толкуйдаах уонна аһаҕас кэпсэтии буолла диэн быһа түһэн этиэххэ сөп. Ветеринардар, о.д.а. тыа сирин идэлээх дьонун хамнаһа, буоһатыы үлэтэ, ыччат тыа сиригэр үлэлии, олохсуйа барарыгар үбү-харчыны төлөөһүн, сылгыны, сүөһүнү иитиигэ субсидия — кэпэтиһии, ырытыһыы үөһүгэр турда.  Егор Борисов Россия Дьоруойа, аатырбыт ыанньыксыт Михаил Готовцев тыа хаһаайыстыбатын бүгүҥҥү туругун туһунан сыанабылын, тыа сиригэр күүс-уох киллэрэргэ кини этиитин, санаатын холобур быһыытынан аҕалла.

Тыа сиригэр хаһаайыннааһын туһунан ыйытыкка сыһыаннаан, Егор Афанасьевич былаас усулуобуйаны модьуйуо суохтааҕын, дьон бэйэлэригэр табыгастаах уонна сөптөөх өттүн талыахтааҕын ордук чиҥэтэн эттэ. Хаһаайыннааһын хайа баҕарар көрүҥэ: соҕотоҕун фермерскэй хаһаайыстыбаны тэрийии, кооперативы эбэтэр кооперативнай тэрилтэни үлэлэтэри дьон бэйэтэ быһаарыахтаах.
"Кэлиҥҥи кэмҥэ эдэр дьон тыа хаһаайыстыбатынан утумнаахтык дьарыктанан, бу чэпчэкитэ суох үлэҕэ ситиһиилэрдэнэриттэн мин олус үөрэбин", - диэтэ кини.
Егор Афанасьевич эдэр дьон государствоттан көмөнү эрэйбэккэ, бэйэлэрин кыахтарынан үлэлииллэрин бэлиэтээн эттэ. Үксүгэр кинилэр: «Эһиги мэһэйдээмэҥ эрэ. Үлэтин биһиги бэйэбит кыайыахпыт!», - дииллэр. Аммаҕа бүгүн уот энергиятынан хааччыйыы уустугурбут. Маныаха анаммыт дьон ыйытыгар «Якутскэнерго» бэрэстэбиитэлэ  Андрей Соначев хоруйдаата. Кини эппитинэн, баар тиһиктэри уларытыыга кэлимсэ тэрээһини компания ыытар. Ол курдук, саҥа трансформаторы туруораллар, линиялары тардаллар, энергия кыамтата сүрүннэнэр. Оттон Егор Борисов «Якутскэнерго» салалтатын кытта кэпсэтиэх буолан эрэннэрдэ.

Аммалары туохтааҕар да суол туруга долгутар. Былырыын аһара ардаан, республикатааҕы суолталаах «Амма» суолга икки км. уһуннаах сир сиҥнибит. 2014 сылга «Амма» уонна «Бөтүҥ» суолларыгар республика бюджетыгар 181 мөл. солк., ол иһигэр 135 мөл. солк. бу суоллар хапытаалынай өрөмүөннэригэр көрүллүбүтүн тырааныспар миниистирэ Семен Винокуров эттэ. Үп-харчы хапытаалынай тутуулаах үс муостаҕа, сиҥнибит сиртэн трассаны уларытыыга, о.д.а. ананыаҕа.

Егор Борисов аммалары кытта көрсүһүүтэ олус истиҥник ааста. Социальнай саҥа тутуулар, тыа сирин өйөөһүн иһин дьон республика салалтатыгар улаханнык махтанна. Амма улууһун баһылыга  Александр Артемьев, правительство председателин солбуйааччы  Петр Алексеев, министиэристибэлэр уонна биэдэмистибэлэр салайааччылара көрсүһүүгэ көхтөөхтүк кытыннылар.