Дьокуускайга бэс ыйын 19-тан 22-гэр диэри ыытыллар күрэхтэһии Россия сүүмэрдэммит хамаандатын таларга бастакы уонна саамай дьоһун түһүмэх буолар. Манна талыллыбыт хамаанда 2014 сылга Ташкеҥҥа (Узбекистан) көҥүл тустууга аан дойду чемпионатыгар кыттар. 2016 сыллааҕы Рио ди Жонейроҕа (Бразилияҕа) ыытыллар олимпиада эмиэ ырааҕа суох. Саха сирин спортсменнара буолаары турар күрэхтэһиигэ хайдах кытталларыттан дойду олимпийскай хамаандатыгар киирэллэрэ эбэтэр киирбэттэрэ быһаччы тутулуктанар уонна быһаарыллар.

Егор Борисов Саха сирин спортсменнара утарсааччыларын хайдах сыаналыылларын, төһө мэтээли ыларга суоттаналларын туһунан ыйыталаста.

Саха сирин хамаандатын старшай тренерэ Владимир Кириллин спортсменнар күрэхтэһиигэ бэлэмнэрин туһунан иһитиннэрдэ. Тустууга 2014 сыл тохсунньу 1 күнүттэн ыла киирбит уларыйыылар бу күрэхтэһиигэ аахсыллыахтарын, спортсменнар физическэй туруктарын, ыйааһыннарын тренердэр болҕомтолорун киинигэр туталларын туһунан эттэ.

Егор Борисов спорт режимин тутуһуу, дьиссипилиинэ, олорор усулуобуйа, тренердэр материальнай өттүнэн хааччыллааларын туһунан туоһуласта.

Саха сирин хамаандатын хапытаана Виктор Лебедев эппитинэн, хамаанда састааба быйыл хаһааҥнытааҕар да эдэр, ол эрээри улахан инникилээх. Россияны уҥуордаан аан дойду таһымнаах үрдүк ситиһиигэ дьулуһуохтарын кини ойуччу тутан эттэ. 2016 сыллааҕа олимпиадаҕа киирэр туһугар киниттэн тутулуктааҕы барытын оҥоруох буолан эрэннэрдэ.

Егор Борисов Россия спортивнай тустуутуну федерациятын кытта ыкса үлэ туһунан сиһилии кэпсээтэ. Федерация салайааччыта Михаил Мамиашвилины кытты кэпсэтиһии түмүгэр республика уонна спортивнай тустуу федерациятын икки ардыларыгар хардарыта үлэлиир туһунан сөбүлэһии түһэрсиллибит.

«Дагестан, Осетия, Бурятия, о.д.а. курдук тустуу күүскэ сайдыбыт дойдуларга буолбакка, чемпионаты Саха сиригэр ыытар туһугар туруорсар, туруулаһар чэпчэкитэ суох этэ. Ол эрээри биһиги ону ситистибит», – диэтэ Егор Афанасьевич.

«Саха сирин тустууну сөбүлээччилэрэ эһигиттэн кыайыыны эрэ күүтэллэр. Саха сирин тустуутун оскуолата Россияҕа баһылыыр-көһүлүүр миэстэни ылыа диэн бүк эрэллээхпин», - диэтэ кини.