Бу мунньах буолуон иннинэ Уһук Илин социальнай-экономическай сайдыытын туһунан бырабыыталылыстыба мунньаҕар  Юрий Трутнев ааспыт сылга буолбут улахан халаантан эмсэҕэлээбит регионнар суолларын чөлүгэр түһэрии бытаарбытын бэлиэтээбитэ. Халаантан алдьаммыт-кээһэммит 1506 суолтан алтынньы 1 күнүнээҕи туругунан 155 км уһуннаах суол оҥоһуллубатах. Юрий Трутнев региоҥҥа тымныы түһэн эрэрин ойуччу тутан эппит.

Итини таһынан суолу тутууну үбүлээһин, бэриллибит үбү-харчыны туһаныыга баар кыһалҕалары, сорох регионнар бырайыактыыр уонна смета докумуоннарын оҥорууга нэстэрин, бытааннарын ырыппыттар.

Тырааныспар инфраструктуратын уопсай туругун туһунан ырытыыга Егор Борисов Саха сиригэр массыына суолун тирэх тиһигэ саҥа үөскэтиллэ сылдьарын эттэ. Өрөспүүбүлүкэ сирин-уотун 90 бырыһыаныгар сырыы дьыл кэмиттэн быһаччы тутулуктарын кини ыйда. Кини эппитинэн, 2012 сылтан бэттэх өрөспүүбүлүкэҕэ суол фондата тэриллиэҕиттэн ыла үбүлээһин түмүгэ мэктиэлэммит. Регионнааҕы уонна олохтоох суолталаах суол туруга биллэ тупсубут.

Суол фондатын үөскэтиигэ нефть бородууктатыгар акциз сүрүн төрүт буолар. РФ нолуогун кодексыгар уонна «Таможня тарыыбын туһунан» РФ сокуоннарыгар уларытыылары киллэрии түмүгэр 2015 сылтан ыла акциз ыстаапката намтыахтаах. Ити түмүгэр СӨ суолун фондатыгар быһаччы дьайара чахчы. Специалистар суоттаабыттарынан, үп-харчы киириитин кээмэйэ 40-50 бырыһыан аччыыр.

Онон, Егор Борисов өрөспүүбүлүкэ сүтэрэр дохуотун толуйууну бу мунньахха туруоруста.