Егор Борисов  уонна бырабыыталыстыба чилиэннэрэ олохтоох хочуолунайга сырыттылар уонна кыстыкка бэлэмнэнии боппуруостарын дьүүллэстилэр. Ону таһынан Тополинайдааҕы орто оскуола туругун көрдүлэр-иһиттилэр. «Гарпана» этно-култуурунай кииҥҥэ Егор Борисов нэһилиэк олохтоохторун кытта көрүстэ. Бу тэрээһиҥҥэ бырабыыталыстыба бэрэссэдээтэлин солбуйааччы  Галина Данчикова, вице-премьер Петр Алексеев, бырабыыталыстыба чилиэннэрэ сырыттылар.

Егор Борисов манна оҥоһуллан тахсар тыа хаһаайыстыбатын бородууксуйатын батарыыны хааччыйдахха эрэ дьиҥнээх сайдыы кэлиэҕин кини чиҥэтэн эттэ. Олохтоохтор тыҥаан турар кыһалҕаларын, олох-дьаһах боппуруостарыгар анаммыт ыйытыктарыгар кини хоруйдаата. «Томпо» тыа хаһаайыстыбатын кооперативын салайааччыта  Николай Лебедев  икки-үс сылынан таба этин оҥорон таһаарыы күүһүрүөн, батарыы хааччылларын туһугар ирдэбилгэ эппиэттэһэр буойуна наадатын ыйда.

Тыа хаһаайыстыбатын миниистирэ Иван Слепцов эппитинэн, министиэристибэ «Томпо» кооперативка модульнай буойунаны биэрэргэ былааннаабыт. Ону таһынан Томпо табаһыттарыгар булуустары тутар соруктаах.

Тополинай Илин Эҥэр улууска киирсэрэ сөбө суоҕун олохтоохтор эттилэр. Кэлии, барыы, айан ыараханынан, айылҕатын, климатын усулуобуйатынан Арктика улуустарыгар чугаһын кинилэр бэлиэтээтилэр. Егор Афанасьевич кинилэр ити этиилэрин кытта сөпсөстө уонна нэһилиэк кыһалҕаларын туспа ырытар, дьүүллэһэр наадатын ыйда. Дьиэ-уот, коммунальнай хаһаайыстыба миниистирэ Алексей Колодезников бу нэһилэккэ эппиэтинэстээҕинэн ананна.

Тополинайга оҕо садын тутууну дьон сытыытык туруорда. Онуоха Егор Борисов өрөспүүбүлүкэҕэ оҕо садтарын тутууга кредит ылар туһунан бүтүн аан дойдутааҕы бааны кытта кэпсэтии ыытыллыбытын. Ити ымпыгар-чымпыгар тиийэ, иҥэн-тоҥон быһаарыллыбытын, бүтэһиктээх сөбүлэһиигэ тиийбиттэрин кэнниттэн арҕаа дойду Россияҕа сыһыаннаах бобуута күүһүгэр киирбит. Баан бэрэстэбиитэллэрэ бу гуманитарнай бырайыакка бобуу дьайыа суоҕа дииллэр эрээри, саарьахтааһын син биир баарын Егор Борисов эттэ. Чопчу уонна чуолкай быһаарыы балаҕан ыйын ортотугар биллиэхтээх.

Үөрэх миниистирэ Сардаана Татаринова Тополинайга оҕо сада булгуччу тутуллуоҕун туһунан эттэ. Бүтүн аан дойдутааҕы баан үбүгэр-харчытыгар буолбатаҕына, өрөспүүбүлүкэ бюджетын үбүгэр-харчытыгар тутуллуоҕа.

Егор Борисов олохтоохтор Социалистическай үлэ Дьоруойа Василий Михайлович Кладкин сырдык кэриэһин харыстаан кини күюрүүлээхтик үлэлээбит «Томпо» хаһаайыстыбатын илдьэ сылдьалларыгар махтанна.

Василий Кладкин хаалларбыт баайын харыстааһын ситэтэ суоҕун, бу баай хаҥатыллыахтааҕын, сайдыахтааҕын кини бэлиэтээтэ. Саха сирин бырабыыталыстыбатын Хаандыгаҕа бөһүөлэгэр көһө сылдьар мунньаҕын быһаарыыларыгар тирэҕирэн тыа хаһаайыстыбатын уонна нэһилиэк сайдыытын саҥа кэрдиис кэмин саҕалыыларыгар эттэ.