Ахсынньы 12 күнэ – биһиэхэ дойдубут дьылҕатын быһаарбыт улахан историческай суолталаах бэлиэ күн. 1993 сыллаахха норуот бүттүүнүн куоластааһынан РФ Конституциятын ылыныллыбыта, онтон лоп курдук сүүрбэ сыллааҕыта Россия Президенин Ыйааҕынан ахсынньы 12 күнэ государственнай бырааһынньыгынан биллэриллибитэ.

Биһиги дойдубут сүрүн сокуона Россия правовой тиһигин төрүтүнэн буолар. РФ Конституцията киһи быраабын уонна көҥүлүн биллэрбитэ, киин сир уонна территориялар икки ардыларыгар боломуочуйалары тыырсыы, сөбүлэһиннэрии демократическай тускулларыгар олоҕуран Россияҕа федерализмы олохтооһуҥҥа тирэх буолбута.

Саха Өрөспүүбүлүкэтэ Россия быстыспат сорҕотунан буолар. Өрөспүүбүлүкэбит норуоттара биир сомоҕо федеративнай Россия государствота атаҕар туруутугар уонна ону бөҕөргөтүүгэ сүдү кылааттарын киллэрсибиттэрэ.

Биир кэлим социальнай-экономическай сайдыы баран, Саха сирэ Российскай Федерацияҕа уонна Дальнай Востокка сүрүн субъект быһыытынан ааҕыллар. Саха сиригэр олох таһыма үрдээн, социальнай эйгэ балаһыанньата тупсан иһэр. Ахсаабат кыһамньы, болҕомто дьиэ кэргэн сыаннастарын харыстааһыҥҥа, духуобунай уонна культурнай сайдыыга ууруллар. Ситиһиилэрбит Дальнай Восток уонна бүтүн дойду экономикатыгар улаханнык сабыдыаллыыллар.

Бука бары күүспүтүн түмтэхпитинэ олох уйгутун өссө тупсарыахпыт, үрдүк ситиһиилэрдэниэхпит.

Күндү биир дойдулаахтарым!

Эһиэхэ чэгиэн доруобуйаны, этэҥҥэ буолууну, саҕалааһыннаргытыгар ситиһиини баҕарабын! Олоҥхо сиригэр эйэ уонна сөбүлэһии баар буола туруохтун! Уруй-айхал!

Егор БОРИСОВ,

Саха Өрөспүүбүлүкэтин Ил Дархана.