Кинилэр ортолоругар Дьокуускайтан Россия үрүҥ көмүс призера Эльшад Агаев, П.Пинигин бирииһин кыайыылааҕа Сергей Собакин, өрөспүүбүлүкэ чемпиона Миша Бродников, Уус-Алдантан Гоша Вензель, Тааттаттан Албан Авакумов, Нерюнгриттэн Никита Плотников, о.д.а. үүнэн иһэр ааттаах-суоллаах тустууктар бааллар.

Кылаабынай судьуйанан биир дойдулаахпыт, ССРС спордун маастара, Саха Өрөспүүбүлүкэтин үтүөлээх тренерэ М.М.Каженкин үлэлээтэ. Михаил Михайлович күрэхтэһии хаамыытын, сыалын-соругун туһунан бу курдук сырдатта:

- Мин бу турнирга төрдүс төгүлүн кылаабынай судьуйанан үлэлиибин. Саамай элбэх тустуугу Чурапчы, Уус-Алдан, Дьокуускай куорат хамаандалара аҕалбыттар. Быйыл кыттааччы аҕыйах курдугун да иһин, күүстээх бөҕөстөр кэлэннэр хара маҥнайгыттан олус кыраһыабай, сытыы бырахсыылардаах хапсыһыылары көрдөрдүлэр. Мөлтөх эрчиллиилээх оҕо суох, бу тренердэр миэстэтигэр үчүгэйдик үлэлииллэрин туоһутунан буолар.

2000-2001 с. т. оҕолор эһиил ыытыллар «Азия оҕолоро» норуоттар икки ардыларынааҕы оонньууларга кыттарга сүүмэрдээһини ааһаллар. Түөрт түһүмэхтээх үөрэтэр-эрчийэр түмсүүлэри ыытыахтаахпыт. Бастаан 30, онтон 20 тустуугу хаалларан күрэхтэһиигэ бэлэмниэхтээхпит.