«Таҥыллыбыт хамаанда букатын саҥа. Хамаанада хас биирдии чилиэнэ Олимпиадаҕа кыттар Россия сүүмэрдэммит хамаандатыгар киирэр туһугар дьулуһуохтаах. Үчүгэй көрдөрүүнү ситиһэргэ суоттанабыт», - диэтэ спортивнай маастарыстыба үрдүкү оскуолатын дириэктэрэ Александр Игнатьев.

Көҥүл тустуу ыстаарсай тренерэ Владимир Кириллин спортсменнары бэлэмнээһин үлэтигэр тохтоото.«Спортсменнар сборга барыахтарын иннинэ 70 кг диэри уонна 70, 74, 86, 97,120 кг диэри ыйааһыннаахтары икки бөлөххө араарбыппыт. Бастакы бөлөх Кабардино-Балкарияҕа "Лужьба" спорт базатыгар сылдьыбыта», - диэтэ тренер.

Кабардино-Балкарияҕа норуоттар икки ардыларынааҕы кылаастаах спорт маастара  Римус Мамбетов, быраастар, массажистар, психологтар спортсменнары кытта ыкса үлэлээбиттэр.

Иккис бөлөх муус устар бүтүүтэ Владикавказка тиийбит. «Хотугу Осетия кылаабынай тренерин  Малик Тугеевы кытта элбэҕи ырыппыттар. Билигин спортсменнар сыл устата сыраласпыттарын түмүгүн көрдөрөр тыҥааһыннаах кэмнэрэ чугаһаата. Россия сүүмэрдэммит хамаандатыгар киирэр туһугар сүҥкэҥ тургутууну ааһыахтаахтар», - диэтэ  Кириллин.