Дьокуускайга буолбут Россия чемпионатыгар ситиһиилэммит спортсменнар Россия сүүмэрдэммит хамаандатын састаабыгар киирбиттэрин туһунан республика баһылыгын эбээһинэһин быстах кэмҥэ толорооччу  Егор Борисов эттэ.

 "Арменияҕа уонна Азербайджаҥҥа ыытыллар норуоттар икки ардыларынааҕы турнирга биһиги тустууктарбытыгар кыттар кыаҕы биэрдилэр. Саха сирин норуоттарын оонньууларын кэнниттэн от ыйын 15 күнүттэн ыла Иван Ярыгин норуоттар икки ардыларынааҕы турнирга бэлэмнэнии бастакы түһүмэҕэ саҕаланыаҕа", - диэтэ старшай тренер.

Республика баһылыгын эбээһинэһин быстах кэмҥэ толорооччу, Саха сиринээҕи спортивнай тустуу федерациятын президенэ Егор Борисов дойду чемпионатыгар «кыһыл көмүс», "үрүҥ көмүс» уонна «боруонса» мэтээллэри ылыы улахан ситиһии буоларын бэлиэтээтэ. Тренердэргэ уонна спортсменнарга кини махтанна уонна туруоруллубут сорук туолбутун ордук чиҥэтэн эттэ.

Россия чемпионата Дьокуускайга бэс ыйын 20-22 күннэригэр «Триумф» спорт комплексыгар үрдүк тэрээһиннээхтик ыытыллыбыта. Манна дойду 34 субъегыттан барыта 237 спортсмен кыттыбыта. Мэтээл ахсаанынан Дагестан бөҕөстөрө бастакы, Хотугу Осетия тустууктара  иккис, оттон Саха сирэ үһүс миэстэҕэ тиксибиттэрэ.