«2015 сылы дойду президенэ сүрэх-тымыр ыарыыларын утары үлэ сылынан биллэрбитэ. Бу ыарыыттан олохтон туоруур дьон ахсаана элбии турар. Саха сиригэр бу тула нэһилиэнньэҕэ эрэ буолбакка, медицинскэй үлэһиттэргэ туһуламмыт элбэх тэрээһин ыытыллар», - диэн СИА-ҕа  СӨ доруобуйа харыстабылын миниистирин солбуйааччы Людмила Вербицкая эттэ.

Конференцияҕа Россиятааҕы кардиологическай уопсастыба президенэ, Санкт-Петербурдааҕы В.А.Алмазов аатынан медицинскэй чинчийэр киин дириэктэрэ Евгений Шляхто «Сүрэх-тымыр ыарыыларын хос сэрэтии» туһунан иһитиннэрии оҥордо. Ыарыыны сэрэтиигэ, эмтээһиҥҥэ баар кыһалҕалары уонна ону туоратыыга туох үлэ ыытылларын туһунан кэпсээтэ.

«Сүрэхтэрэ ыалдар, ыарахан туруктаах саха оҕолорун эпэрээссийэлээн, олоххо хаттаан төннөрбүт Киин буолар», - диэн эбэн эттэ Л.Вербицкая.

Миниистири солбуйааччы бэлиэтээбитинэн, Саха сиригэр ордук дьон сүрэх-тымыр ыарыыларыттан өлөр. Кэлиҥҥи сылларга эдэр дьон элбэхтэ ыалдьар буолбут. «40-тан тахсыбыт, үлэлии сылдьар дьон инсультан, инфарктан өлөр түбэлтэлэрэ элбээтэ. Чөл олох уонна ыарыыны эрдэттэн сэрэтии эрэ биһиги сүрэхпитин уонна мэйиибитин харыстыан сөп. Ыалдьыбыт дьону чөлүгэр түһэриигэ, эмтээһиҥҥэ аныгы хирургическай ньымалары туһаныыга, олох таһымын үрдэтиигэ күүскэ үлэлиибит. Ол гынан баран, үлэбит сүрүн сыала-соруга дьон букатын ыалдьыбатыгар туһаайыллар», - диэтэ Людмила Вербицкая.

Саха сирин бырабыыталыстыбата уонна В.А.Алмазов аатынан медицинскэй чинчийэр киин бииргэ үлэлиир туһунан дуогабары түһэристилэр. Дуогабарга наукаҕа хардарыта дьайсан үлэлээһин, быраастар идэлэрин үрдэтии киирэр.