Республика баһылыга Егор Борисов правительствоҕа сыллааҕы Илдьитигэр итинник сорудаҕы  биэрдэ.
Президент ааспыт сыл атырдьах ыйыгар тахсыбыт «Коммерческайа суох тэрилтэлэр государство социальнай политикатын олоххо киллэриигэ оруолларын үрдэтии туһунан» уураахха сигэннэ.

Саха сиригэр кэнники 5 сылга социальнай хайысхалаах общественнай тэрилтэлэр ахсааннара икки төгүл элбээтэ уонна биэс сүүскэ тиийдэ. Республикаҕа билигин барыта 1700-тэн тахса общественнай тэрилтэлэр бааллар.

«Кинилэр бүгүн айар-тутар дьайыылара биллэ улааппыта үөрдэр. Ити тэрилтэлэртэн аҥардара кумааҕыга эрэ буолбакка, дьиҥнээхтик үлэлииллэр, бэйэлэрин кэккэлэригэр сүүһүнэн, тыһыынчанан дьону түмэллэр», - диэтэ президент.

Итинэн сибээстээн кини волонтердар уонна аһымал хамсааһыннар сайдалларыгар, ордук эмтиир уонна социальнай тэрилтэлэргэ, эбии усулуобуйа тэрийии ирдэнэрин эттэ. «Ону таһынан бастыҥ  волонтердарга уонна меценаттарга республика государственнай наҕараадатын аныырга көрдөһүөм этэ», - диэн эбэн эттэ президент.

Саха сирин баһылыга ол эрээри тэрээһин өттүнэн элбэх көтүтүүлэр баалларын ыйда.

«Итини учуоттаан, онно сөп түбэһэр толорор былаас органын уонна общественнай түмсүүлэри кытта алтыһан үлэлиир уонна киһи, оҕо, урбаанньык, Хотугу аҕыйах ахсааннаах норуоттар бырааптарын көмүскүүр боломуочунай правительство бэрэссээдээтэлин солбуйааччы дуоһунаһын эбии киллэрэргэ быһаардыбыт», - диэтэ баһылык.

Ити сыалтан былаас органнара бары хайысхалаах общественнай көҕүлээһиинэри гранынан өйөөһүн оруолун үрдэтэллэрэ ирдэнэр.