Өрөспүүбүлүкэ баһылыга Егор Борисов алмаас компаниятын саҥа президенин Андрей Жарковы билиһиннэрэригэр мунньах дьоһун бэбиэскэлээҕин ыйда. «Былаас уорганын уонна уопсастыбаннас бастайааннай хонтуруолларыгар сылдьар боппуруостар бэбиэскэҕэ киирдилэр. Ити боппуруостар Саха сирин бырабыыталыстыбата уонна АЛРОСА компания 2020 сылга диэри болдьохтоон түһэрсибит сөбүлэһиитин олоххо киллэриигэ сыһыаннаахтар», - диэтэ.  

Саха Өрөспүүбүлүкэтин бырабыыталыстыбата уонна «АЛРОСА” АК 2011 сыл кулун тутарыгар түһэрсибит өрөспүүбүлүкэ социальнай-экономическай сайдыытын туһунан сөбүлэһиини дьүүллэһэри уонна хардарыта бииргэ үлэлээһин сорох боппуруостарын сүрүннүүрү, итилэргэ чопчу быһаарыылары ылары былааннаабыттар.

Андрей Жарковы «АЛРОСА» АК президенинэн талар туһунан быһаарыыны «АЛРОСА» (ААО) АК кэтээн көрөр сэбиэтэ 2015 сыл муус устар 23 күнүгэр ылыммыта. Андрей Жарковы кытта контрагы үс сылга болдьохтоон түһэристилэр.

Андрей Вячеславович Жарков 1973 сыллаахха олунньу 11 күнүгэр Женеваҕа төрөөбүт.

1995 сыллаахха Москватааҕы государственнай лингвистическэй университекка үөрэнэн «Омук тыла» идэни ылбыт.

1998 сыллаахха Москватааҕы государственнай коммерция университетыгар үөрэнэн «Бухгалтерскай учуот уонна аудит» идэни ылбыт.

1995-2001 с.с.  РФ Киин баанын күндү металлары кытта операция отделыгар 1 категориялаах эксперинэн, сүрүн эксперинэн, кылаабынай специалиһынан, кылаабынай дилерынан, отдел начальнигынан үлэлээбит;

2001-2006 с.с. – «Норильский никель» хайаны байытар-металлургическай компания отделын начальнигынан, салайыы начальнигын солбуйааччынан-кылаабынай менеждерынан үлэлээбит;

 2006-2008 с.с.. –«Центрстройреконструкция» ХЭТ генеральнай дириэктэрэ;

2008-2009 с.с.. –«РУСАЛ Глобал Менеджмент Б.В.» филиалыгар бырайыак салайааччыта, «Эн+Менеджмент» ХЭТ бырайыак салайааччыта;

2009-2010 с.с. – «Приокский завод цветных металлов» ААО коммерческай дириэктэрэ, «Новосибирский аффинажный завод» ААО дириэктэрдэрин сэбиэтин чилиэнэ;

2010-2015 с.с. – РФ үпкэ министиэристибэтин салалтатынан үлэлиир Россия Гохранын салайааччытын солбуйааччы, «ПО «Кристалл» ААО дириэктэрдэрин сэбиэтин бэрэссэдээтэлэ.