Абый улууһун баһылыгын бирииһигэр көҥүл тустууга күрэхтэһии ыытылынна

Соторутааҕыта Үрүҥ Хайаҕа «Абый улууһа» МО баһылыга Михаил Никулин бирииһигэр көҥүл тустууга күрэхтэһии буолла. Онно алта хамаандаттан 78 эдэр бөҕөс 14 ыйааһынынан күүһүн холосто. Оттон хапсаҕайга муҥутуур күүстээҕи быһаарар хапсыһыыга 13 уол кытынна.


Икки күннээх тыҥааһыннаах хапсыһыылар түмүктэринэн Үрүҥ Хайатааҕы оҕо спортивнай оскуолатын иитиллээччилэрэ хамаанданан бастакы миэстэни ыллылар. Иккиһи - Абый, үсүһү - Майыар эдэр бөҕөстөрө ыллылар.
Түһүлгэ бастыҥ бөҕөстөрүнэн буоллулар: «Бастыҥ техникатын иһин» - Антон Стручков (Муҥурдаах оскуолата), «Бастыҥ хапсыһыы иһин» - Аяс Монгуш (Үрүҥ Хайа гимназията), Мичил Слепцов (Абый оскуолата), «Кэскиллээх бөҕөс» - Степа Щелканов (Ураһалаах оскуолата), «Кыайыыга дьулуурун иһин» - Артем Жирков (Майыар оскуолата).
Улуус баһылыгын бирииһигэр аан бастаан ыытыллыбыт күрэхтэһии үрдүк тэрээһиннээхтик барбытын бэлиэтээтилэр, мантан ыла сыллата кыттааччытын ахсаана элбээн иһэригэр баҕардылар.