Бүгүн мандатнай хамыыһыйа, судьуйалар хамаандалар бэрэстэбиитэллэрин кытта сүбэ мунньахтара уонна бастакы күн тустуохтаах бөҕөстөр ыйааһыннаныыны барыылара буолар.

Субуотаҕа, олунньу 7 күнүгэр, сарсыарда 9-00 чаастан күнүс 14-00 чааска диэри 57, 65, 74, 97 кг ыйааһыннарга барыллаан хапсыһыылар ыытыллаллар.

15-00 чаастан— күрэхтэһиини үөрүүлээхтик аһыы.

16-00 чаастан - 57, 65, 74, 97 кг ыйааһыннарга түмүк хапсыһыылар.

Өрөбүлгэ, олунньу 8 күнүгэр, сарсыарда 10-00 чаастан күнүс 14-00 чааска диэри 61, 70, 86, 125 кг ыйааһыннарга барыллаан хапсыһыылар.

16-00 чаастан 61, 70, 86, 125 кг ыйааһыннарга түмүк хапсыһыылар.

Санатар буоллахха, былырыын республика улахан түһүлгэтигэр отут хамаандаттан 333 бөҕөс кыттыбыта. Онно Дьокуускай хамаандата бастаабыта, намнар уонна мэҥэ-хаҥаластар иккис, үһүс миэстэлэри ылбыттара.

Ыспыраапка: Николай Николаевич ТАРСКАЙ (1924-1962) Уус-Алдан оройуонугар төрөөбүтэ. Москватааҕы физическай культура институтун үөрэнэн бүтэрбитэ. 1955-1959 сс. – республикатааҕы спорткомитет председателинэн үлэлиир кэмигэр боксаҕа, көҥүл тустууга, ыарахан атлетикаҕа республика чемпионаттарын аан бастаан тэрийбитэ. Кини көҕүлээһининэн «Спартак» стадион тутуллубута, спорт национальнай көрүҥнэрин быраабылалара, нормативтара бигэргэммиттэрэ. Саха сиригэр спорт историятын сырдатар бастакы кинигэ бэчээттэммитэ. 1956 сыллаахха Н.Н.Тарскай көҕүлээһининэн Саха сирин норуоттарын бастакы спартакиадата ыытыллыбыта.