Бу улахан түһүлгэҕэ Саха сириттэн 44 бөҕөс тустуоҕа. Күрэхтэһиини үөрүүлээхтик арыйыы сарсын, ыам ыйын 29 күнүгэр, киэһэ 17 чаастан «Триумф» спортивнай бэлэмнэнии киинигэр буолуоҕа. Чемпионакка күүстээх тустууктардааҕынан биллэр регионнар: Дагестан — 42, Хотугу Осетия — 30, Бурятия — 18, Тува — 12, Красноярскай — 18, Москва — 10, Санкт-Петербург — 12 бөҕөһү аҕаллылар.
Уолаттарбыт дьиэтээҕи түһүлгэҕэ туох баардарынан тустар санаалаахтар. Чемпионакка бэлэмнэнии чэрчитинэн, араас сирдэринэн сылдьан эрчиллибиттэрэ, Казахстаҥҥа уонна Монголияҕа ыытыллыбыт норуоттар икки ардыларынааҕы турнирдарга кыттыбыттара.
«Уолаттарга маннык таһымнаах күрэхтэһии сылга иккитэ — саас уонна күһүн — ыытыллар. Онтон сааскыта сүрүннэринэн ааҕыллар. Манна бастаабыттар аан дойду, иккис буолбуттар Европа чемпионаттарыгар кыттар быраабы ылаллар», - диэн эттэ Оҕо спордугар уонна спорка солбугу бэлэмнээһиҥҥэ управление салайааччыта Роман Оконешников.
Күрэхтэһии бочуоттаах ыалдьыттарынан Россия спортивнай тустууга федерациятын президенэ Михаил Мамиашвили, Россия спортивнай тустууга федерациятын вице-президенэ Арсен Фадзаев уо.д.а кэлэллэрэ күүтүллэр.
Комментарии
Авторизация на сайте через социальные сети