Улуус дьаһалтатын саҥалыы оҥоһуллубут аактабай саалатыгар спорт бэтэрээннэрэ, спортивнай общественность, улуус салайааччылара мустан, биллиилээх тренери чиэстээтилэр, Чурапчы сиригэр кэлбитинэн истиҥ эҕэрдэлэрин тиэртилэр. Улуус баһылыга Андрей Ноговицын Чурапчы спортивнай улуус буоларын тоһоҕолоон бэлиэтээтэ, манна спорт, чуолаан тустуу сайдыытыгар улахан болҕомто уурулларын эттэ, күндү ыалдьыкка улууспут киэн туттар ууһа Василий Попов оҥорбут батыйатын бэлэхтээтэ. Магомед Гусейнов саха тустууктарын ситиһиилэригэр кырата суох кылааттааҕын ыйан туран, “За вклад в развитие района” диэн бочуоттаах бэлиэни туттарда.

Спорт миниистирэ Михаил Гуляев уонна Чурапчытааҕы институт ректора Иннокентий Готовцев Магомед Гусейнов улууспутугар, республикабытыгар ыалдьыттааһына тустуу сайдыытыгар, саҥаттан саҥа чаҕылхай ааттар тахсыыларыгар олук буоларын ыйдылар. Улуу тренер эдэр тренердэрбитин кытта үлэлээн, элбэҕи сүбэлээн барыыта үтүө түмүктэри, улахан ситиһиилэри эрэннэрэрин эттилэр.

Спорт бэтэрээннэрин аатыттан Семен Морфунов тыл эттэ. Валерий Герасимов уонна Валентина Пинигина сахалыы сиэри-туому толорон, алгыстаатылар. Сылаҥ күпсүүрдьүт уолаттарын тэтимнээх охсууларын, алыптаах хомус дьырылас тыаһын ыалдьыппыт олус сэргээтэ, астыммытын биллэрдэ.

Күндү ыалдьыппыт Магомед Гусейнов саха дьонуттан олус астынарын эттэ: “Олус үлэһит дьоҥҥут, маннык тымныы дойдуга сүрэххит сылааһынан, дьаныардаах үлэҕитинэн, булгуруйбат кытаанах санааҕытынан, үтүө алгыскытынан үүнэ-сайда олороҕут. Мин Дмитрий Петрович Коркин олорбут дьиэтин бүгүн көрдүм, музейга сырыттым. Олус долгуйдум, улуу тренер төрөөбүт дойдутугар кэлбиппиттэн дьолломмуттуу сананным. Кини тыыммыт салгынынан тыынаммын күүс-уох ылынным. Егор Афанасьевич Борисовка, Михаил Дмитриевич Гуляевка, Чурапчы улууһун баһылыгар Андрей Тимофеевич Ноговицыҥҥа уонна Саха сирин тустууну таптааччыларыгар барыларыгар махтанабын. Миигин бүгүн чиэстээбиккититтэн олус үөрдүм. Бу барыта эһиги норуоккут тустууну олус таптыырын бэлиэтиир уонна миэхэ инники үлэбэр өссө улахан эппиэтинэһи сүктэрэр. Куруук кыайыыны ситиһиэхтээхпит диэн эһиги миэхэ сорук туруордугут. Ону мин күүс-кыах баарынан толоро сатыам. Дьоһун-мааны Чурапчы оройуонун олохтоохторо, күндү доҕоттоор барыгытыгар доруобуйаны, дьоллоох уһун олоҕу баҕарабын”.

Улуу тренери кытта көрсүһүү олус истиҥ уонна долгутуулаах буолла. Дьоһун тыллаах-өстөөх киһи эбит диэн дьон астынна. Түмүккэ мустубут дьон Россия көҥүл тустууга кылаабынай тренерэ Магомед Гусейновы кытта хаартыскаҕа түһэн, илии тутуһан, кэпсэтэн эҕэрдэлээтэ, алгыһын тириэртэ.