Пресс-конференция кэмигэр  Егор Борисов республика араас муннуктарын дьонун-сэргэтин кытта оробуочай көрсүһүүлэрин түмүгүн таһаарыаҕа, олохтоох бэйэни салайыныы реформатын, Россия чемпионатын туһунан ырытыаҕа.

Егор Борисов дьону-сэргэни кытта оробуочай көрсүһүүтэ

Ыам ыйын ортотуттан ыла Егор Борисов республика элбэх улуустарыгар сылдьан олохтоохтору кытта көрүстэ. Егор Афанасьевич промышленнай, Илин Эҥэр, Бүлүү оройуоннарыгар тыҥаан, сытыырхайан турар боппуруостары таарыйда.

Ити сырыы түмүгүн ылан кылгастык ырытар буоллахха, алданнары уонна нерюнгрилары ордук ДьКХ уларытыы, доруобуйа харыстабыла, саахалланар кутталлаах эргэ дьиэлэртэн дьону көһөрүү ордук долгутара биллибитэ. Мииринэй дьоно медицинэни таһынан Интернет боппуруоһун сытыытык туруорбуттара. Ленскэйдэр суол туругун, медицинскэй өҥө мэһэйэ суох оҥоһулларын уонна хаачыстыбатын өрө туттулар. Таатталар Илин Эҥэр улуустары гаастааһын, кииннэммит ититиигэ холбонуу туһунан долгуйалларын биллэрдилэр.

Үстэн ордук нэдиэлэ устата Егор Борисов Нам, Горнай, Мэҥэ-Хаҥалас, Хаҥалас, Уус-Алдан, Амма, Чурапчы, Таатта, Алдан, Нерюнгри, Сунтаар, Ньурба, Үөһээ Бүлүү, Бүлүү, Ленскэй, Мииринэй, Өлүөхүмэ улуустарыгар Дьокуускай куорат таһынааҕы Жатай бөһүөлэгэр сырытта. Тиийбэтэх атын улуустары кытта кини видеонан быһа сибээскэ таҕыста.

Олохтоох салайыныы реформата

2014 сыл ыам ыйын 27 күнүгэр «РФ-ҕа олохтоох бэйэни салайыыны тэрийии сүрүн принциптарын туһунан» үлэлии турар федеральнай сокуоҥҥа улартыылар киирбиттэрэ. Манна РФ Президенэ В.Путин илии баттаабыта. Егор Борисов этэринэн, онон олохтоох салайыныы реформатын боппуруоһа дьон ортотугар сытыытык турара оруннаах:

- Сокуон базата олох уларыйыытыгар сөп түбэһиннэриллэн, уларыйа турар. Республикаҕа олохтоох салайыныы торумун дьүүллэһиигэ, муниципальнай баһылыктары талыы барыйааныгар сахалар көхтөөхтүк кытталлар. Кэлэр алта ый устатыгар олохтоох бэйэни салайыныы икки көрүҥүттэн биирин талыахпыт.

Дьүүллэһии кэнниттэн муниципальнай тэриллиилэр санааларын, баҕаларын, этиилэрин мунньуохпут уонна хайа муниципалитекка уларыйыы киириэхтээҕин, ханна уруккунан хаалыахтааҕын быһаарыахпыт. Итинник бары өттүттэн эргиччи ырытыһыы кэнниттэн олохтоох бэйэни салайыыны тэрийэр уонна сүрүннүүр сокуон ылыллыаҕа.

Көҥүл тустууга Россия чемпионата

Көҥүл тустууга Россия чемпионата республика баһылыгын э.т., спртивнай тустуу федерациятын президенэ Егор Борисов өйөбүлүнэн, Дьокуускайга 2014 сыл бэс ыйын 18-22 күннэригэр ыытыллар.

Саха сиригэр бу саамай биһирэнэр уонна тарҕаммыт спорт көрүҥэ. 2002 уонна 2011 сс. РФ чемпионаттара Саха сиригэр ыытыллыбыттарын санатыахха сөп. 2014 сыл саҕаланыыта Егор Борисов РФ спортивнай тустууга федерациятын кытта кэпсэппитин түмүгэр, чемпионат быйыл Саха сиригэр буолуоҕа.

Чемпионат сүрүн сыала-соруга 2016 сыллааҕы Олимпиадаҕа туһаайыллар. «Талааннаах спортсменнары өрө таһаарыахтаахпыт. Биллэн турар, ити уустук сорук. Ол эрээри, булгуччу холонуох тустаахпыт», - диэтэ Егор Борисов.