Мэтээллэр дьиҥнээх кыһыл, үрүҥ көмүстэртэн уонна боруонсаттан кутулуннулар. Мэтээллэр бриллианнаахтар. Бриллиант таас чемпионат Саха сиригэр ыытыллыбытын, санаа, дьулуур күүһүн, чиэһи бэлиэтиир.

Мэтээл төгүрүк быһыылаах. Сирэйигэр төгүрүччү «Чемпионат России по вольной борьбе. Якутск-2014» диэн суруктаах. Ону таһынан тустууктар, оттон кэннигэр  «Минспорт РФ. Федерация спортивной борьбы РФ» диэн суруктаах уонна Саха Республикатын гиэрбэтэ ойууламмыт.

Барыта маннык 40 мэтээли оҥордулар. Кыһыл уонна үрүҥ көмүс мэтээллэр ахсааннара аҕыстыы, боруонса — 16. Итини таһынан кыайыылаахтар тренердэригэр эмиэ кыһыл көмүс мэтээли биэриэхтэрэ. Ити ахсаана эмиэ 8 устуука.

«Атын регионнарга маннык суох. Россияҕа да, кыраныысса тас да өттүгэр биһиги мэтээллэрбит буккааһа суох ыраастарын туһунан билэллэр. Ити күрэхтэһии кыттыылаахтарыгар умнуллубат өйдөбүлү хаалларар», - диэтэ республика спортка миниистирэ Михаил Гуляев.

Көҥүл тустууга Россия чемпионата сарсын «Триумф» спорт комплексыгар саҕаланар.