«Быйылгы Россия чемпионата Саха сиригэр ураты улахан суолталаах. Бастатан туран, 50 сыл анараа өттүгэр Дьокуускай спортсменнара аан бастаан РСФСР таһымыгар туста тахсыбыттара. Бу бэлиэ үбүлүөйдээх сылга күрэхтэһии буоларын ойуччу тутан бэлиэтиэх этим. Иккиһинэн, күрэхтэһии — дьон-сэргэ ортотугар тустууну тарҕатыы, пропагандалааһын. Саха тустууктара төһө бэлэмнээхэриттэн ити быһаччы тутулуктанар. Күрэхтэһии быдан инниттэн көрдөрөр-иһитиннэрэр тиһиктэргэ спортсменнары аһары арбааһын, хайҕааһын саҕаланар. Ити тохтуон наада», - диир спорт бэтэрээнэ.

«Егор Борисов чемпионат Саха сиригэр ыытылларын ситиспитэ — улахан кыайыы. Өрөспүүбүлүкэҕэ тустуу эрэ буолбакка, уопсайынан спорт сайдыы саҥа таһымҥа тахсарыгар кини күүскэ сыралаһар», - диэн  Валерий Кочнев эбэн эттэ.

«Көҥүл тустуу — Саха сиригэр бастакы нүөмэрдээх спорт. Бу көрүҥ биһигини аан дойду таһымыгар таһаарар. Чемпионаты тэрийэн ыытыы сыл бастыҥ уонна бэлиэ событиета буолара чахчы», - диэтэ кини.  

Көҥүл тустууга Россия чемпионата Дьокуускайга бэс ыйын 19-тан 22-гэр диэри ыытыллар. Эрдэ этэн аһарбыппыт курдук, Саха сириттэн ыйааһыҥҥа барытыгар 27 бөҕөс кыттар. 57 кг, 61 кг уонна 65 кг кыттар спортсменнарбытыгар улаханнык эрэнэбит. Саха спортсменнара Россия сүүмэрдэммит хамаандатын састаабыгар киирэргэ дьулуһаллар. Ол кэнниттэн Ташкеҥҥа буолар аан дойду чемпионатыгар. Итиннэ 2016 сыллааҕы Олимпиадаҕа путевканы түҥэтиэхтэрэ. Чэпчэки ыйааһыҥҥа Саха сирин бөҕөстөрүгэр Чечня, Дагестан, Хотугу Осетия, Карачаева-Черкесия, Тыва уонна Бурятия спортсменнара утары туруохтара, күөн көрсүөхтэрэ. Ити дойдулар спортсменнара номнуо Дьокуускайга кэлэннэр, көбүөргэ дьарыктана сылдьаллар.