Нэһилиэк дьаһалтатын баһылыгын солбуйааччы Егор Малышев кэпсээбитинэн, бильярд кулуубун тэрийиини уонна күрэхтэһиини ыытыыны сэлиэнньэ олохтооҕо, тутуунан дьарыктанар ИП Владимир Тарбахов көҕүлээбит. Кулуубу аһыы үөрүүлээх түгэнигэр улуус баһылыгын көмөлөһөөччүтэ Егор Захаров, спорткомитет председателэ Гаврил Вырдылин, Дьохсоҕон нэһилиэгин баһылыга Галина Арылахова, о.д.а.мустубут дьону эҕэрдэлээтилэр.

Үөрүүлээх чаас кэнниттэн спортсменнар жеребьевканан икки бөлөххө арахсан оонньоотулар. Күн устата ыытыллыбыт сыралаах киирсии түмүгэр Ытык Күөлтэн Афанасий Оконешников чемпион үрдүк аатын ылла. Эмиэ улуус кииниттэн кыттыыны ылбыт Пантелеймон Сенькин иккис, Боробултан Иван Филиппов үһүс буолан үөрүү-көтүү аргыстаннылар. Кыайыылаахтарга мэтээллэр, грамоталар уонна анал бириистэр туттарылыннылар.

Бастакы аһаҕас турнир үрдүк тэрээһиннээхтик ааспытыттан бары кыттааччылар улаханнык астыннылар. Тыа сирин үлэһит дьоно бэйэ-бэйэлэрин кытта бодуруһан, бильярд албастарыгар хардарыта үөрэнсэн санаалара көтөҕүлүннэ.