„Айылгы“ КуоДСК ыалдьыттарбытын көрсө оҕотуттан кырдьаҕаһыгар диэри элбэх киһи муһунна. Күннэри үөрүүлээхтик аһыыга Чурапчы улууһун баһылыгын бастакы солбуйааччы А. А. Ноговицын, Таатта улууһун баһылыга М. М. Соров, Таатта улууһун депутаттарын сэбиэтин председателэ В. А. Охотин эҕэрдэ тыл эттилэр.

Сахалар бары киэн туттар киһибит Б.Ф. Неустроев-Мандар Уус: „Былыр-былыргыттан ыкса ыаллыы олорор талыы Таатта, кэрэ Амма уутун иһэн, сэргэстэһэ алаастарга оттоон-мастаан сүөһү, сылгы ииттинэн олорор доҕордуу Чурапчыбыт дьонугар-сэргэтигэр Ытык Таатта сириттэн нөрүөн-нөргүй! Биһиги доҕордоһуубут өссө дириҥээн, сибээспит бөҕөргөөн иһэригэр олук уурарга аналлаах „Таатта күннэргэ—Чурапчыга“ дьаһалы аһарбыттан үөрэбин, инникибит сырдык, кэскилбит киэҥ буолуохтун!“,--диэн алгыс тылы эппитэ дохсун ытыс тыаһынан доҕуһуолланна. Доҕордоһуу оһуохайа дуораһыйда.

Таатта талба талааннаахтарын быыстапкатын сөҕө-махтайа көрдүбүт, МФСК-ҕа буолбут атыы-эргиэн дьаарбаҥкатыгар сылдьан сахалыы ас арааһын билистибит, дьиэбитигэр сөбүлүүр аспытын атыылаһан илии тутуурдаах, өттүк-харалаах тиийдибит.

Кулун тутар 15 күнүгэр сарсыарда 10 чаастан Кыайыы 70 сылынан икки улуус бэрэстэбиитэллэрэ Военкомат тумуһугар Аҕа дойду Улуу сэриитин кыттыылаахтарыгар аналлаах пааматынньыкка венок уурдулар, миитин буолла.

Сонун күрэхтэһии - шорт-трек

Чурапчы—Таатта спорка күрэхтэһии урут-уруккуттан ыытыллар. Араас көрүҥнэргэ—ат сүүрдүүтүгэр, тустуу икки көрүҥэр, хайыһарга, дуобакка, саахымакка, волейболга, баскетболга, остуол тенниһигэр, о. д. а. илин-кэлин түсүһэн кэллибит. Икки улуус дьоно-сэргэтэ бу күрэхтэһиини олус сэҥээрэр, элбэх көрөөччү мустар. Тыҥааһын аһара күүстээх буолан,ардыгар мөккүөр да күөдьүйэн ылар түгэннэрэ баар буолуталыыллара.

Бу сырыыга спорт тэрийээччилэрин сүбэлэһиилэринэн күрэхтэһиигэ саҥа көрүҥ - шорт-трек киллэрбит. Арааһа, илин эҥэргэ бу көрүҥҥэ бастакы күрэхтэһии буоллаҕа буолуо.

Куоталаһыы Чурапчы орто оскуолатын анныгар баар күөлгэ ыытылынна. Барыта 11 спортсмен кытынна. Уолаттар 500 м, эр дьон 1 км сырыстылар. Уолаттарга Семен Кириллин (Чурапчытааҕы гимназия) бастаата, Эрик Барашков (Чурапчы орто оскуолата) иккис, Арсен Дедюкин (Таатта) үһүс буоллулар. Эр дьоҥҥо Дьулус Егоров (Чурапчы) чемпионнаата, иккиһи Иннокентий Ноговицын (Чурапчы), үсүһү Семен Ноговицын (Чурапчы) ыллылар. Түмүккэ 2 уол 2 эр киһи бириэмэтинэн Чурапчы хамаандата кыайыылааҕынан таҕыста. Бастыҥнарга грамота, анал мэтээл туттарылынна.

“Мандардыын кэпсэтии”

Таатта күннэрин чэрчитинэн, “Мандардыыр кэпсэтии” көрсүһүү тэриллиннэ. Саха Республикатын Духуобунаска академиятын академига, бүтүн саха норуота ытыктыыр үтүө-мааны киһитэ Мандар Уус кэпсээнин, олоххо көрүүлэрин, сырдык санааларын атах тэпсэн олорон олус сэргээн иһиттибит.

Кини сүбэлэрэ санааларбытын сааһылыырга, күннээҕинэн олорбокко норуоппут туһугар түмсүүлээхтик үлэлииргэ ыҥыраллар, кэрэни сыаналыырга, кэскиллээҕи толкуйдуурга туһаайаллар. Бу көрсүһүүгэ кэлбит дьон сырдык санааны истэн, ыйытыы биэрэн толлору хоруйу ылан олус астынан тарҕаста.

Ыаллыы улуустар кэскиллээҕи сүбэлэстилэр

Былыргыттан биир силистээх-мутуктаах Талыы Таатта үрэҕин уутунан киһи-хара буолан, дьоһун сурахтаах, ытык-мааны төрүттэрдээх Боотуруускай улуус сыдьааннара Чурапчы уонна Таатта улууһун аҕа баһылыктара, салайааччылара дьаһалта дьиэтигэр түмсэн сүбэ мунньах ыыттылар.

Улууспут баһылыга А.Т.Ноговицын, улуус Мунньаҕын председателэ Я.П.Оконешников уонна Таатта улууһун баһылыга М.М.Соров, мунньах председателэ В.Н.Охотин биир президиумҥа олорон икки улуус кэскиллээх соруктарын торумнастылар, инникитин хардарыта көмөлөһүү өссө көхтөөхтүк ыытылларыгар сүбэлэстилэр. Улуустар депутаттара, нэһилиэк баһылыктара, управлениелар начальниктара, сүрүн тэрилтэлэр салайааччылара бу мунньахха кыттыыны ылан сүбэлэһии соруктарын толору иһиттилэр. Ыаллыы улууспут салалтата аны сайын Чурапчыга ыытыллар Олоҥхо ыһыаҕар күүс-көмө, өйөбүл буоларга бэлэмин эттэ.

Улуустар баһылыктара А.Т.Ноговицын уонна М.М.Соров ыаллыы улуустар хардарыта көмөлөсүһэн, сайдыы суолугар бииргэ дьулуһан иһэллэрин тэрийэн эрэллэрэ махталлаах, үтүө инникилээх.

 Айар куттаахтар түһүлгэлэригэр

Кулун тутар 15 күнүгэр “Айылгы” КуоДСК Чурапчы уонна Таатта улуустарын айар куттаахтара, тэрилтэ салайааччылара, библиотека үлэһиттэрэ кыттыылаах бэрт истиҥ көрсүһүү буолла. Таатта оройуонун Кыйы, Чөркөөх, Баайаҕа, Ытык Күөл, Чычымах нэһилиэктэриттэн айар түмсүүлэр бэйэлэрин үлэлэрин туһунан билиһиннэрдилэр.

Ол курдук, И.А. Аргунов аатынан киин библиотека иһинэн тэриллэн үлэлиир “Уран тыл” литературнай түмсүү салайааччыта О.П. Андросова оҥорон таһаарбыт кинигэлэрин туһунан сырдатта, түмсүү чилиэннэрин кытта билиһиннэрдэ. Маны таһынан алгысчыт И.И. Унаров – Унаар Уйбаан, Баайаҕа нэһилиэгин “Көмүлүөк күлүмэ” түмсүүтүн салайааччы Н.И. Баайаҕыын, Чөркөөхтөн “Иэйии” литературнай түмсүүттэн И. Лукачевскай – Силис, Е.П. Харитонова, В.Д. Пинигина, А.Коноева – Дьүрүскээнэ айар үлэлэрин туһунан кэпсээтилэр, ырыа ыллаан, хомуска оонньоон иһитиннэрдилэр.

Чурапчы улууһун Хоптоҕо нэһилиэгиттэн билиҥҥи кэмҥэ бэрт тахсыылаахтык үлэлиир-хамсыыр суруйааччыбыт П.П. Федоров – Сомоҕо “Дириҥ Уоттара” литературнай түмсүү историятыттан быһа тардан, билиҥҥи кэмҥэ туох үлэ барарын, былааннанарын туһунан сиһилии кэпсээтэ. “Саҥа олох” хаһыат редактора А.А. Захаров кэлбит ыалдьыттары истиҥник эҕэрдэлээтэ. Кэпсэтиигэ С. Феоктистов – Сэргэх Сэмэй, “Чараҥ” сурунаал редактора О.В. Жиркова, Т.А. Кардашевскай, Н.В. Максимов, М.А. Герасимова – Сэҥээрэ, В.Д. Пинигина бэйэлэрин санааларын үллэһиннилэр.

Таатталар кэнсиэрдэрэ дохсун ытыс тыаһынан доҕуһуолланна

Кулун тутар 14 күнүгэр киэһэ 5 чаастан Таатта улууһун уус-уран самодеятельноһын кэнсиэрэ буолла. Сааланы толору киһи муһунна, эбии олоппос киллэрэн олорооччулар, туран да эрэ көрөөччүлэр элбэхтэрэ.

Кэнсиэр үөрүүлээх чааһыгар икки улуус баһылыктара, депутаттарын сэбиэтин председателлэрэ, нэһилиэктэрин баһылыктара сценаҕа ыҥырылыннылар. А.Т. Ноговицын уонна М.М. Соров улуустарбыт доҕордоһуулара инникитин өссө күүһүрэн иһэригэр, бииргэ үлэлэһии түмүктээх буоларыгар баҕа санааларын эттилэр.

Улахан кэнсиэргэ элбэх киһи кытынна. Оҕо үҥкүү ансаамбылларын, искусство оскуолатын преподавателлэрин инструментальнай толорууларын, тоҕус томтордоох Чурапчыга тоҕус баянист толоруутугар Чурапчы гимнин (көрөөччүлэр бары сүһүөхпүтүгэр туран иһиттибит), биирдиилээн талба талааннаах ырыаһыттары сөҕө-махтайа иһиттибит, ытыс дохсун тыаһынан көрүстүбүт.