Делегацияны оройуон баһылыга Николай Старостин салайан илдьэ сырытта. Ньурба улууһун дьаһалтатын дьиэтигэр оройуон баһылыга Борис Попову кытта көрүстүбүт. «Төгүрүк остуолга» санаа үллэстиитигэр оройуон Сэбиэтин депутаттара, улуус управлениеларын, тэрилтэлэрин салайааччылара кытыннылар. Икки улуус баһылыга олоххо-дьаһахха, үлэҕэ-хамнаска бииргэ үлэлэһэр туһунан сөбүлэһиигэ илии баттаатылар.

«Төгүрүк остуолга» икки улуус бэрэстэбиитэллэрэ хардарыта үлэлэрин-хамнастарын, инники былааннарын билиһиннэрдилэр. Түмүккэ Николай Прокопьевич Борис Николаевичка Манчаары төрөөбүт-үөскээбит алааһыгар оонньообут бэһин хаартыскатын, «Манчаары дохсун олоҕо оҕо хараҕынан» диэн кинигэни, улууспут туһунан таһаарыылары бэлэхтээтэ. Ньурбалар ааттарыттан Борис Николаевич уйгу-быйаҥ чороонун туттарда.

Салгыы делегация кыттыылаахтара Ньурба куорат социальнай уонна производственнай суолталаах тэрилтэлэринэн сылдьан үлэ-хамнас хаамыытын билистилэр. Кырдьаҕастар дьиэлэригэр, реабилитационнай кииҥҥэ, оҕо музыкальнай оскуолатыгар, Ньурбатааҕы көтөрү иитэр фабрикаҕа о.д.а. сылдьан олоҕу-дьаһаҕы, үлэни-хамнаһы билистилэр.

Духуобунас уонна Олоҥхо дьиэтигэр олохтоохтор ыалдьыттары аал уоту оттон алгыһынан, кымыһынан айах тутан көрүстүлэр. Оройуон Сэбиэтин бэрэссэдээтэлэ Сергей Евсеев, Ньурба улууһун кырдьаҕастарын сэбиэтин бэрэссэдээтэлэ Ким Федоров, биһиги улууспутуттан Сергей Холмогоров эҕэрдэлээтилэр. Көрсүһүү бэлиэтигэр оһуохай түһүлгэтин тэрийдилэр, Ньурбалыы оһуохайы Александр Софронов таһаарда.

Быыстапка павильонугар биллиилээх муосчут, саха народнай уонна Россия үтүөлээх худуоһунньуга Федор Марков үлэлэрэ көрдөрүүгэ туруорулуннулар.

Күн иккис аҥарыгар Манчаары Ньурбаҕа кэлиитин туһунан номохтору кэпсэтистилэр. Онно кыраайы үөрэтээччилэр Николай Мартынов, Виктор Борисов, Вячеслав Егоров, Василий Винокуров‒Кыталый Баһылай кытыннылар. Петр Тихонов Манчаары эдэр эрдэҕинэ Тэппээк ойуун киниэхэ илбис иҥэрбитин аҕынна. Малдьаҕарга Ксенофонт Уткин этии киллэриитинэн көмүллэн сытар сиригэр өйдөбүнньүк бэлиэ туруоруллубут. Бэлиэни Егор Оҕотоойоп уонна Борис Данилов толкуйдаан оҥорбуттар. Манчаары дьиҥнээх көмүллүбүт сирэ умайбыт, былыргы кырдьаҕастар Манчаары уҥуоҕун хаһыыга атын киһи көмүүтүн ыйан биэрбиттэр диэн этэллэр.

Саха норуотун легендарнай геройа Манчаары туһунан Ньурба улууһун көһө сылдьар театра уонна олохтоох самодеятельность хас да спектаклы туруорбуттар. Онон улууспут киэн туттар киһитэ Манчаары олоҕун тиһэх сылларыгар тиийэн олохсуйбут дойдутугар аата-суола үтүө тылынан ахтылларын истэн астынныбыт.

Сааскы каникул кэмигэр Василий Винокуров салалтатынан «Кыталык» народнай үҥкүү ансаамбыла Бүлүү бөлөх улуустарынан, Мирнэйинэн гастрольга сырытта. Биһиги Ньурбаҕа тиийэрбитигэр Сунтаартан кэлбиттэрэ. Ньурба куоратыгар «Кыталык» культура киинигэр улахан концеры туруордулар, ньурбалар күргүөмүнэн кэлэн саалаҕа көрөөччү толору буолла. Концерт үөрүүлээх аһыллыытыгар оройуоммут баһылыга Николай Старостин, Ньурба улууһунааҕы оройуон Сэбиэтин бэрэссэдээтэлэ Сергей Евсеев, Ньурба куорат баһылыга, улуус баһылыктарын ассоциациятын бэрэссэдээтэлэ Алексей Иннокентьев эҕэрдэ тыл эттилэр. Концерга ырыаһыттар Сардаана Осипова, Айтал Матчитов, олоҥхоһут Петр Тихонов, тойуксут Анисия Степанова, хомусчут Айаан Верховцев кытыннылар.

Делегация Манчаары Баһылай олоҕун тиһэх сылларыгар 1870 с. диэри 10 сыл олорбут, көмүллүбүт нэһилиэгэр Малдьаҕарга сырытта. В.И.Максимов аатынан орто оскуолаҕа көрсүһүүгэ Малдьаҕар нэһилиэгин баһылыга Никита Иванов былырыын Манчаары Баһылай төрөөбүт алааһыгар Арыылаахха сылдьан сүгүрүйэн ааспыттарын кэпсээтэ, махтал тылларынан аҕынна. Догдоҥо нэһилиэгиттэн, Манчаары төрөөбүт дойдутуттан баһылык Иван Новгородов малдьаҕардары кытта ааспыт сылларга алтыһан ааспыттарын, икки нэһилиэги Манчаары ситимниирин бэлиэтээтэ.

1979 с. Манчаары Баһылайга аналлаах өйдөбүнньүк бэлиэ туруоруллубут Ытык сиригэр сырыттыбыт. Олоҥхоһут Петр Тихонов сүгүрүйүү сиэрин-туомун толордо.