Отчуоттуур бөлөхтөр түөрт хайысханан, улуус бары нэһилиэктэрин ордорбокко сылдьаннар, отчуоттарын туруоруохтара. Бастакы бөлөҕү улуус баһылыга Николай Старостин, иккис бөлөҕү баһылыгы бастакы солбуйааччы Семен Потапов, үһүс бөлөҕү баһылыгы олоҕу-дьаһаҕы хааччыйыыга уонна сиргэ-уокка куттал суох буолуутун боппуруостарыгар солбуйааччы Николай Колмаков, төрдүс бөлөҕү баһылыгы социальнай боппуруостарга солбуйаачы Иван Птицын салайыахтара.

Быйылгы отчуокка нэһилиэнньэттэн ыйытыы, баҕар кириитикэ даҕаны, балачча буолара күүтүллэр. Ол курдук, улуус дьаһалтатын сыллааҕы үлэтигэр биллэр ситиһиилэри сэргэ: тутуу тэтимнээхтик барар, сибээс тупсар, тыа хаһаайыстыбатыгар улуус бюджетыттан көрүллэр үп элбэтиллэр — туоратылла илик итэҕэстэр эмиэ бааллар: Чүүйэҕэ боруода сүөһүлэр турар комплекстара гаас оттукка баччааҥҥа диэри холбоно илик, «Манчаары» кооператив билиҥҥи балаһыанньата, үүтүн харчытын тутан олороро, Майаҕа саҥардыллыбыт собуот үлэтин ыллыгар киирэ илигэ, уо.д.а сылы тэҥҥэ «түмүктэһэн» эрэр проблемалар.

Онон быйылгы отчуокка нэһилиэктэр олохтоохторо көхтөөхтүк кыттыахтара, кыһалҕаларын толору этиниэхтэрэ диэн улуус дьаһалтатыгар эрэнэллэр.