Олохтоохтор отчуокка көхтөөхтүк кытыннылар. Ыйытыылар сүрүннээн өрүү туруорсар боппуруостара хайдах быһаарыллыбытын сураһыы буолла: саҥа таас оскуола дьиэтэ быйыл тутуллан түмүктэнэрин дуу, суоҕун дуу, гаас ситимэ тоҕо тардыллыбат буолбутун, балыыһаҕа оптимизация, нэһилиэккэ кэлэр айан суолун өрөмүөннэтии. Республика салалтатыттан госсулууспа үлэһиттэригэр оптимизация төһө ыытылларын, улахан спортивнай-маассабай тэрээһиннэри ыытыы төһө барыстааҕын, газохимическэй собуот, Аллараа Бэстээххэ социальнай-комплекснай киин тутуллуутун, предпринимателлэргэ туох көмө оҥоһулларын, тыа хаһаайыстыбатын салаатын үлэһитин хамнаһа тоҕо үрдэтиллибэтин, үүт сыанатын, ОДьКХ кииннэммит ититэр ситимҥэ дьиэни-уоту холбооһун салгыы хайдах ыытылларын ыйыталастылар. Хорообукка Суола үрэҕи туоруур хаарбах туруктаммыт муостаны таас-тимир муостаҕа саҥардары туруорустулар.

«Хорообут» ХЭО салайааччыта Прокопий Плотников нолуоктары төлөһүүгэ чэпчэтиилэри тобулар наадатын, эт, үүт сыанатын быһаарарга, батарыыга бэйэтин көрүүлэрин үллэһиннэ. Тыа сирин хаһаайыстыбатын үлэһитэ 30 000 хамнастаах буоллаҕына эрэ дьон санаата кэлэн үлэлиэҕин ыйда. Билиҥҥи туругунан хаһаайыстыба 37 эрэ үлэһиттээх хаалбыт.

ОДьКХ учаастагын начальнига Гаврил Аргунов үлэһиттэр хамнастара хайаан да үрдэтиллэрин туруоруста. Христина Борисова соҕурууттан атын боруоданы аҕалан иитэри биһирээбэтин биллэрдэ, газохимическэй собуот тутулларын утарда, сүөһү аһылыгын тупсарыыга үлэни-хамнаһы туһаайарга эттэ.

Агафий Иванов тыа хаһаайыстыбатыгар сүҥкэн оруоллаах Хорообут лиманнай систематыгар төрдүттэн өрөмүөн ыытыллара уолдьаспытын, уматык сыаната тоҕо үрдэтиллэрин, үүт сыаната үөтэлээбэтин, кэмигэр төлөһүллүбэт биричиинэтин нэһилиэнньэ ситэ билбэтин, тыа хаһаайыстыбатын тэрилтэтигэр хамнас кэмигэр кэлбэтиттэн, намыһаҕыттан дьон үлэлии кэлбэтин, бородууксуйаны батарыыга уустуктар үөскүүллэрин туһунан санаатын эттэ.

Владимир Сосин гаас ситимин Хорообукка тардыбат буолуу туһунан быһаарыыны быһа бааччы ылыммакка, нэһилиэнньэ балаһыанньатын өйдөөн хайаан да ыараҥнатан көрөр, тыа хаһаайыстыбатын салаатыгар үбү-харчыны сөптөөхтүк аттарар, тыа сирин сайдыытын программата хайдах толоруллан иһэрин хонтуруоллаһар наадатын эттэ.

Нэһилиэк баһылыга Валерий Колосов бөһүөлэк ортотугар турар электро-уот үрдүк күүрүүлээх подстанциятын атын сиргэ көһөрөргө «РЭС-2» тэрилтэ тоҕо үлэлэспэтин, нэһилиэнньэ сылаас, сырдык олоххо тардыһарын быһыытынан суолу оҥорторорго, гаас ситимин тардыыны олоххо киллэрэргэ туруоруста.

Олохтоохтор СР Правительствотын үлэтин-хамнаһын биһирииллэрин биллэрдилэр.

Мэлдьэхсигэ

Мэлдьэхсигэ отчуоту истэ 63 киһи сырытта. Нэһилиэккэ электро-уот күүрүүтэ мөлтөҕө үгүс киһини долгутар. Дьокуускайга ГРЭС-2 тутуллуутугар республика бюджетыттан төһө үп-харчы көрүллүбүтүн, газохимическэй собуот тутуллуута төһө көдьүүстээҕин, республикаҕа сүөһү-ас аччатыллыбатын туһугар туох үлэ ыытылларын, ыччакка өйөбүл туһунан, тыыл ветераннарыгар дьиэни босхо хаһан бэриллэрин, сэрии кэмин оҕолоругар туох өйөбүл оҥоһуллуоҕун, медкииҥҥэ көрдөрүнүү уочарата тоҕо уустугун, ФАП дьиэтэ хаһан өрөмүөннэнэрин туоһуластылар. Гаас ситимигэр дьиэни-уоту, хочуолунайы холботуу, субсидия боппуруостара инники күөҥҥэ турда.

Василий Куприянов улуустааҕы оҕо спортивнай оскуолатыгар биир дойдулаахпыт, олимпийскай чемпион Тимир Пинегин аатын иҥэртэрэр сөптөөҕүн, спортивнай сааланы ороскуоттаах диэн саптарбакка ыччат дьарыктанар киинин быһыытынан өссө сайыннарарга санаатын эттэ.

Дмитрий Андреев ОДьКХ салаата сайдыбакка, тоҕо сарбыллыы өртүгэр баран иһэри, үүккэ бэриллэр харчыны ынах ахсааныгар төлөһөр сөптөөҕүн, сиргэ-дойдуга буортуну аҕалар газохимическэй собуоту биһиги улууспутуттан тэйиччи, тайҕаҕа тутар наадатын бэлиэтээтэ.

Надежда Андросова СР Ил Дархана Егор Борисов сөптөөх үлэни-хамнаһы ыытарын, дьону кытта аһаҕастык кэпсэтэрин бэлиэтээтэ, тутулла турар кулууп ситэриллэригэр күүс-көмө буоларга, оскуолаҕа төрдүттэн өрөмүөн ыытыллыбатаҕа ырааппытын, манна болҕомтону уурарга туруоруста.

Антонина Степанова Хорообукка сытар балыыһа сарбыллыыга түбэстэҕинэ, Мэлдьэхситтэн ханна баран сытан эмтэнэллэригэр мунаарда. Нэһилиэк баһылыга Владимир Шарин саҥа учаастактааҕы балыыһа дьиэтин тутарга баҕа санаатын эттэ.

Бөкөҕө

Олохтоохтор очуокка көхтөөхтүк кытыннылар. Чуолаан оскуола уонна оҕо саадын инники балаһыанньалара хайдах буолуоҕун, нэһилиэк кэскилин, гаастааһыҥҥа үлэ-хамнас, подрядчиктар үлэлэрин туһунан, Манчаары Баһылай төрөөбүтэ 210 сылын бэлиэтээһиҥҥэ туох былааннар баалларын ыйыталастылар.

Кулууп директора Светлана Гоголева кулууп дьиэтэ эргэрэн хаарбах туруктаммытын, дьон үлэлиир, сынньанар усулуобуйата суоҕун болҕомтоҕо ыларга, интернат сабыллан эрэр сураҕа баарынан бөһүөлэги харыстыыр туһугар сабыллыыга тиэрдибэттэригэр көрдөстө.

Светлана Иванова «Манчаары» ТХПК туттарыллыбыт үүт харчытын төлөһөрө уолдьаспытын, хамнас боппуруоһугар санаатын эттэ. Гаврил Стручков оттук маска субсидия итиэннэ оскуоланы салгыы сайыннарыыга спорт хайа эрэ хайысхатынан үлэлиир буолара ордугун эттэ. ОДьКХ учаастагын начальнига Роман Морозов үлэһиттэргэ хамнас үрдэтиллэрин туруоруста.

Нэһилиэк баһылыга Иван Новгородов республика сайдыытыгар үлэ-хамнас сөптөөхтүк ыытылларын бэлиэтээтэ. Нэһилиэккэ сүөһү-ас кыралаан эбиллэрин этэн туран, саха национальнай геройа Манчаары Баһылай төрөөбүт дьиэтин-уотун сөхсүтүүгэ, Арыылаахха суолу-ииһи оҥорторууга көмөлөһөллөрүгэр, туризмы сайыннарыы да көдьүүстээх буолуоҕар санаатын эттэ.